РУСКИ КЕРЕСТУР – У Руским Керестуре вчера пребувала екипа ТВ-емисиї „Граждан” Радио-телевизиї Сербиї (РТС), хтора ше занїма з проблематику националних меншинох и зняла прилоги у катедралней церкви, у Националним совиту (НС) Руснацох и у Здруженю женох „Байка”.
Як „Рутенпрес” дознава од редакторки емисиї Вери Раичевич, у Керестуре су уж треци раз, а на тот завод жадаю представиц Кирбай як церковне швето, о чим бешедовали з парохом о. Михайлом Малацком, котри и ширше представел нашу Грекокатолїцку церкву.
Прилог о будуцих задаткох нового зволаня НС Руснацох екипа РТС зняла у шедзиску Совиту у Замку з предсидательом Вивершного одбору Совиту Жельком Ковачом, а о чуваню рускей традициї у просторийох Здруженя женох „Байка”. О тим за РТС бешедовала предсидателька Здруженя Славица Катона, а за тоту нагоду членїци „Байки” пририхтали часц своїх вишиваних, тканих и гекланих ручних роботох и писанки.
Прилоги зняти у Керестуре, у емисиї „Граждан” би мали буц емитована на вовторок, 21. априла найвироятнєйше на 11,25 годзин на Першей програми РТС.
