Любов ґу писаню пришла помали и сциха

автор Л. Вереш
201 Опатрене

Теми за приповедки пренаходзи зоз живота, зоз нєвичерпного и вше ориґиналного жридла. То найчастейше подїї и судьби з имиґрантского живота у Канади, дзе ше стретал и упознал людзох зоз цалого швета, людзох з рижних културох, релиґийох, филозофийох

Славомир Олеяр велїм познати як автор хтори свойо приповедки обявює у „Шветлосци” и у Руским християнским календаре. Другим є заш, познати по збиркох приповедкох, друкованих у двох кнїжкох – „Нашенє” и найновшей „Порвисла”. Вон за себе люби повесц же є по походзеню перше зоз Дюрдьова, а потим зоз цалого швета. Зоз супругу  през лєто жиє у Канади, а през жиму на Флориди, дзе звичайно одходза у новембру, та у франти люби повесц же шнїг видза найчастейше лєм на телевизиї.

До Канади пришол у лєтних панталонох

Славомир, як и велї други у тедишнї час, до Канади одлучел пойсц пре политичну ситуацию на териториї бувшей Югославиї 90-их рокох. Як и сам припознава, на своєй скори нє раз добре почувствовал цо значи жиц у держави у хторей национализем доминантна политична идеолоґия, у хторей тедишнї режим стварял атмосферу страху и мержнї ґу другим народом, приказуюци их як хтошка хто загрожує сербску националну сиґурносц. Жиц у таким окруженю нє бул Славомиров вибор, а кед му у єдней хвильки було аж и загрожене, кед уж и його власна еґзистенция була упитна, кажда дилема о напущованю держави за ньго була одогната.

– До Канади сом пришол у лєтних панталонох и ценким капуцику, нєсвидоми того же яка ту жима, и праве теди у Торонту зазначена рекордно нїзка температура од минус 40 ступнї Целзиюсових. Язик сом нє знал, окрем фразох з каубойских филмох як цо наприклад „Hands up!” односно „Горе руки!” и „Where are you coming from stranger?” односно „Одкаль ши странцу?”. Окрем язика, нє познал сом нїкого хто би ми могол помогнуц. До помоци ми пришла українско-канадска Суспильна служба хтора ми у перших мешацох обезпечела змесценє, материялну помоц (поживу и 100 долари на мешац) и адвоката за правне реґулованє мойого статусу – започина Славомир нашу розгварку и предлужує далєй бешеду:

– Кед сом почал робиц, сцел сом им виплациц трошки хтори мали пре мнє, алє ме одбили зоз словами: „Ми помогли тебе, а длуство спрам нас виплациш так же и ти помогнєш тому кому помоц будзе потребна” – добре памета тото виреченє наш собешеднїк.

Гоч Олеяр закончел Воздухоплївну школу и Факултет защити на роботи, як и пост- дипломни студиї у обласци защити животного штредку, у Канади нє могол найсц роботу. Теди одлучел же накадзи кущичко звлада язик – упише ше на факултет.

– Учел сом язик и паралелно робел у єдней пицериї на розвоженю єдлох, а вноци сом робел як ноцни чувар у єдним будинку. Бул сом реални и знал сом же зоз таким знаньом язика то найлєпши роботи яки можем робиц. Прето сом ше, кед сом кельо-тельо звладал язик, уписал на студиї информатики, бо мойо дипломи, гоч сом их нострификовал, нїч нє вредзели, зоз обгрунтованьом же „хто зна цо ви там учели”, та ме анї у єдней фирми нє сцели прияц, аж анї як волонтера. Информатика ми випатрала як найлєпше ришенє, бо ту нє потребне першокласне знанє анґлийского язика. Добре знанє програмских язикох було достаточне за роботу, а елементарне знанє анґлийского було достаточне за комуникацию – виприповедал нам Олеяр.

По законченю студийох нашол роботу у єдней од водзацих канадских банкох як менаджер у оддзелєню у хторим ше розвивал софтвер за одоброванє кредитох векших од пейц милиони долари. Славомир робел на контроли розвою того софтверу, а потим на контроли ризику при даваню кредита. Мал флексибилни роботни час и цала робота була ориєнтована на резултат, а нє на препровадзени час на роботним месце.

Ужива у пензиї

Року 2010. наш собешеднїк одходзи до заслуженей пензиї, у хторей ужива вєдно зоз свою супругу. Як пензионер ше зоз фамелию преселєл зоз Торонта до меншого места, до Сант Катеринесу.

– Синове позакончовали школи, поженєли ше, нашли себе роботу и думам же наша улога як родичох, вивесц их на самостойну драгу, була закончена и же зме могли предлужиц водзиц мирнєйши живот. Супруга и я себе купели квартель у Сант Петерсбурґу, на Флориди, и ту жиєме по пейц мешаци рочнє, док нє прейдзе канадска жима хтору сом добре запаметал по нєвигодносцох и нєприємносцох хтори приноши зоз собу. Уживаме у климатских предносцох хтори тоти два места маю и стараме ше хасновац пензию цо длужей – гварел наш собешеднїк и предлужує бешеду о тим же тераз ма ище єден гоби хтори го виполнює:

– У Канади сом на єдней часци парцели, так повесц у заднїм дворе, преорал меншу заграду дзе хаснуєм знанє и искуство здобуте при оцови у Дюрдьове та садзиме рижну желєняву за хтору знаме же є орґанска, а у преднїм дворе сом засадзел рижни овоци, хаснуюци знанє и искуство здобуте, тиж у Дюрдьове, од дїда хтори, попри пчолох, и то любел робиц – пишно гварел вон.

Любов ґу писаню

У єдней часци синопсису Олеяровей найновшей кнїжки „Порвисла” пише так: „Розличносц шветових културох хтори стретал и вигодни материялни условия „одомкли” у нїм поциснуте жаданє записовац и описовац розлични животни судьби и дожица людзох зоз рижних концох планети глєдаюци у нїх универзалну нїтку за спознаванє драги по хторей путуєме у розличних автох до истого циля.” Тоти даскельо слова найлєпше описали Олеярово дїло. Любов ґу писаню пришла му помали и сциха, а розвила ше зоз любови ґу читаню, хтору здобул ище як хлапчик. То му помогло, як нам гварел, патриц на швет и розумиц го з „отворенима очми” и розвило у нїм свойофайтову любопитлївосц.

– За приповедки виберам теми зоз живота, значи зоз нєвичерпного и вше ориґиналного жридла. То найчастейше подїї и судьби з имиґрантского живота у Канади, дзе сом стретал и упознал людзох зоз цалого швета, людзох з рижних културох, релиґийох, филозофийох. Заєднїцка нїтка шицким нам то же зме нє пришли до Канади прето же нам було добре у матичней держави. Напроцив, кажде з нас ма за собу иншаку приповедку, иншаке дожице и иншаки обставини хтори го приведли ту до, як дахто гутори, „обецаней жеми”. Канада, як и други держави, далєко од того, бо випатра же нєт раю на жеми, гоч кельо го ми глєдаме – гварел Славомир.

Окрем приповедкох, наш собешеднїк пише и науково, науково-виглєдовацки, науково-популарни тексти и есеї хтори обявює у часопису „Шветлосц”, на сайту Academia.edu и на наукових сходох у Чернїгове, у України.

На концу нашей розгварки, питали зме ше Олеярови чи уж почал робиц на нових проєктох, алє вон през франту гварел же то останє його мала тайна, а док ше планованє зисци, та ше вец будземе шицки вєдно радовац.

Секретар руского дружтва сиверней америки

Славомир Олеяр свойочасово бул член, алє и секретар, Руского дружтва Сиверней Америки. През рок Дружтво орґанизовало рочни єшенски сходи, такволани „пикники”, на хторих ше сходзели Руснаци з наших местох. Вжиме були орґанизовани бали на хторих ше грала наша музика и танцовали нашо танци.

ПОВЯЗАНИ ТЕКСТИ