РУСКИ КЕРЕСТУР – На Драмским Мемориялє Петра Ризнича Дядї нєшка тиж буду два представи – дзецинска на 13 и вечарша на 20 годзин. Дзецинску представу „Васо Пикасо” Саву Шкобича, у режиї Ксениї Бодянец, одбавя домашнї ґлумци з Драмского студия АРТ рускокерестурского Дому култури, а на вечар госцую драмски аматере з Петровцох, з Горватскей.
Нєшкайшу дзецинску представу орґанизовано приду патриц и школяре з вецей наших местох котри маю порядну, лєбо виборну наставу по руски, а по представи нащивя и Школу „Петро Кузмяк”, дзе им школяре и просвитни роботнїки пририхтую и окремну програму. Приход школярох з наших местох на Мемориял орґанизує и финансує Oдбор за образованє Националного совиту Руснацох.
Члени КУД „Яким Гарди” з Петровцох на Драмским мемориялє нєшка участвую з представу Дюру Папгаргая „Два карти за Єрусалим”, у режиї Томислава Раца.