НОРТ БАТЛФОРД (КАНАДА) – Кирбай у Українскей католїцкей церкви Шицких Святих у Норт Батлфорду преславени зоз Службу Божу и друженьом внєдзелю, 31. мая.
Числени нашо приселєнци у Норт Батлфорду парохиянє праве тей парохиї, а шветочносц звекшали и госци, парохиянє даскелїх Українских католїцких церквох з околних местох.
Службу Божу служел паноцец Леонид Малков, хтори на концу служби помировал парохиянох, а потим пошвецел воду хтору вирни однєсли до свої домох.
По Служби Божей шветочносц предлужена у церковних просторийох зоз заєднїцким шветочним полудзенком.
Вибудов Українскей католїцкей церкви Шицких Святих у Норт Батлфорду закончена 1953. року, а пошвецена є 11. юния истого року.