КУЛА – Перша схадзка Општинскей ради у новим зволаню отримана вчера, 2. юния зоз хтору предшедовала нововибрана предсидателька Општини др Весна Томич котра по функциї и предсидателька Општинскей ради.
Члени Општинскей ради – мастер социялни роботнїк Бояна Блечич зоз Кули, наставнїца сербского язика и литератури Смиляна Вукелич зоз Червинки, новинарка Ливия Козма зоз Кули, доктор специялиста психиятриї Душан Кулянчич зоз Кули, дипломовани правнїк Дьордьо Перуничич зоз Сивцу, економиста Ґабриєла Саянкович зоз Руского Керестура и спортски роботнїк Милош Томич зоз Кули.
На дньовим шоре були штири точки, перше анґажованє Екстерней ревизиї консолидованого закончуюцого рахунка буджету Општини Кула за 2025. рок, потим було слова о Нарису рочней програми защити, ушореня и хаснованя польопривредней жеми за 2026. рок, потим дата согласносц на ришенє о поставяню началнїци Општинскей управи, дипломованей правнїци Александри Ґаґович на мандат од пейц роки.
Под штварту точку, питаня и предкладаня, членїца Општинскей ради Ґабриєла Саянкович зоз Руского Керестура, вимагала толкованє од предсидательки др Весни Томич же прецо новинаре нє могли присуствовац схадзки СО Кула, медзи котрима бул и новианр Руского слова.
По словох Саянковичовей, предсидателька Томич потолковала же схадзки СО присуствовали лєм новинаре Ку медиї котра обезпечела директни видео пренос, и же нє було намири дискриминациї.
Кед слово о тим, най здогаднєме же новинаре Руского слова поряднє провадзели роботу СО Кула, за цо доставали и материял и поволанки, и же то потупйованє члена 51 Устава Републики Сербиї, у котрим ше ґарантує же шицки маю право на правдиве, подполне и благочасове информованє о питаньох од явногo значеня, а то у тим случаю вибор предсидательки Општини Кула.