БЕОҐРАД/НОВИ САД – Вчера з комеморативнима сходами и кладзеньом квеца и венцох на памятнїки воєних и цивилних жертвох НАТО бомбардованя означена 16- рочнїца од початку бомбардованя тедишнєй Союзней Републики Югославиї (СРЮ).
Предсидатель Републики Сербиї Томислав Николич венєц положел на памятнїк жертвом бомбардованя у Алексинцу, а премиєр Сербиї Александар Вучич присуствовал на комеморациї хтора вчера вечар отримана опрез будинку бувшого Ґенералштабу Войска Сербиї.
Венєц на памятнїк дзецом котри погинули у бомбардованю положел министер за роботу, обезпечованє роботи, борецки и социялни питаня Александар Вулин и з тей нагоди наявел же держава нарок вибудує памятнїк жертвом бомбардованя 1999. року.
У Новим Садзе вчера, на Дзень здогадованя на погинутих у НАТО бомбардованю, отримани комеморативни сход єдинкох ґарнизону Нови Сад, на хторим присуствовали и делеґациї Городу Нови Сад и Автономней покраїни Войводини, а на памятнїки квеце положели и фамелиї погинутих особох.
Бомбардованє СРЮ тирвало 78 днї, од 24. марца по 10. юний и за тот час барз очкодована инфраструктура. Перше цильоване на воєни обєкти, а познєйше руйновани и привредни обєкти, школи, здравствени установи, медийски хижи, памятнїки култури, а велї з нїх до нєшка нє обновени. Оценєте же под час бомбардованя погинули коло 2 000 людзе, а коло 12 000 ранєти.
