НОВИ САД – Вибудов швидкей драги, хтора злучи Бачки брег на гранїци зоз Мадярску и Наково на гранїци зоз Румунию, почнє у першей половки того року, гварене на схадзки Роботней ґрупи хтора будзе провадзиц реализованє того проєкту.
Драга будзе длуга 175 километери и будзе исц през Зомбор, Кулу, Вербас, Бечей, Нови Бечей и Кикинду. Вибудов будзе тирвац блїзко три роки, а министер будовательства Ґоран Весич гварел же тота драга нє будзе значна лєм за Сербию, алє и за Европску унию, прето же будзе найшвидша вяза медзи Румунию и Мадярску.
Министер Весич ище додал же тота швидка драга поруша розвой тей часци Войводини. Гражданє то заслужую, пето же медзи тима општинами хтори повяже драга даєдни наисце занєдзбани. Вон тиж здогаднул и же напредую роботи на вибудови швидкей гайзибанскей драги Нови Сад – Суботица, а на териториї покраїни и два реґионални драги Зомбор – Вербас и Панчево – Зренянин – Кикинда – Канїжа – Суботица о чиєй реконструкциї бешедовал зоз представителями ЕУ.