ВЕРБАС – У Вербаше, у Културно-просвитним дружтве „Карпати”, зоз пригодну програму пияток, 3.фебруара означене Националне швето Руснацох. На початку святочней програми хор КПД „Карпати” одшпивал гимну „Боже правде” и святочну шпиванку „Браца Русини”.
Числену публику и госцох, присутних членох Националного совиту Руснацох и його предсидателя Йоакима Раца, як и пароха старовербаского о. Алексия Гудака и пароха нововербаского о. Данила Задрепка привитал предсидатель Дружтва Микола Папуґа, а з тей нагоди гварел и пар слова о присельованю Руснацох до наших местох. Вецей о тим бешедовала и Амалия Бордаш, котра водзела и конферансу того вечара.
У програми наступели мишани хор КПД „Карпати” и КУД „Жатва” з даскелїма шпиванками, як и солиста Янко Сеґеди. Младежска шпивацка ґрупа и женска жридлова шпивацка ґрупа коцурскей „Жатви” тиж одшпивали вецей шпиванки, а програму прикрашели и школяре котри ходза на пестованє руского язика, Дамян Косич грал на клавиру и Маґдалена Скубан гуторела стихи писнї Михала Ковача. Музичну програму провадзел оркестер Дружтва, а з нагоди означованя Националного швета Руснацох пред вербаску публику наступел и Михайло Будински зоз даскелїма шпиванками.
Присутни нащивителє шицки точки випровадзели зоз громким аплаузом, а по законченю програми предлужене друженє у просторийох КПД „Карпати” у Вербаше.
