РУСКИ КЕРЕСТУР – Всоботу, 9. мая вирни Керестурскей парохиї св. oца Миколая на святочни способ означели свойо швето – Преношенє мощох св. оца Миколая, Мир-Ликийского чудотворца.
Як визначел парох о. Владислав Варґа на раншей Служби Божей, на 8 годзин, було вельо вирних, велї ше висповедали и достали полни одлуст, як то на тот одпустови дзень. Архиєрейску Службу Божу на 10 годзин предводзел кир Георгий Джуджар, а сослужели священїки нашей Епархиї и зоз Крижевского владичества. О защитнїкови керестурскей церкви, а и цалей нашей Епархиї наказовал владика кир Георґий.
Понеже ше у керестурскей церкви св.о. Миколая находза мощи св. оца Миколая вирни у кирбайским дню, а и пред и после нього вихасновали нагоду же би их поциловали и модлєли св. Миколая за свойо намиреня, же би их вон чувал и помагал у потребох.
Вашарска часц Кирбая ше пресцерала по Русинскей улїчки, од Дома здравя, та аж по конєц улїчки, дзе були ринґишпили, гайзибанчки и збиваци авточка, на радосц наймладшим, алє и тим кус старшим.
