Чи ше нам люби, або нє, шицки ми и то каждей хвильки у роботи и творчосци зохабяме шлїди! Даєдних бизме ше радей души и одрекли, даєдни нам випатраю красши як цо су насправди, а на велї зме лєм ровнодушни. Уж як є, то нашо животи и шицко цо зме з дзеку, лєбо нє, витворели. Владо Джуджар, Беґи, у фолклорней секциї Дома култури наисце остал запаметани, а припадал ансамблу єдней зоз наймоцнєйших ґенерацийох керестурских танєчнїкох
Владово початки запаметани ище дзешка концом осемдзешатих рокох прешлого вику, у другей класи основней школи у валалє. Роки од теди прешли, престал ше активно занїмац зоз танцом, алє остали памятки и здогадованя на числени госцованя ширцом по Европи и цалей нашей дакедишнєй жеми.
– Дабоме же дацо баржей паметам, дацо виблядло, алє нїґда нє мож забуц товаришох зоз ансамблу. Моя ґенерация мала трох хореоґрафох, анї нє важне хторим шором, Силвестера Ґачу, Юлина Раца Мишкового, и Якима Раца, Мимия. Од нїх и научене шицко цо ше могло тих рокох и у тих часох – гвари Владо и предлужує.
– Тераз, кед ше огляднєм, нам и репертоар бул наисце широки, богати, моцни… Танцовали зме, зоз шпиваньом, дабоме, „Роботнїцки танєц” (котри и нєшка паметлїви по застави котра облапяла шицок ансамбл), „Труби”, „Повзунєц”, „Гопак”, „Керестурски штири дзвони”, „Коломийку”… и ту нє конєц. Дацо ше и потрацело у вибляднутих памяткох – гвари собешеднїк. Окрем спомнутих, винїмково були добри и вшадзи добре привитани и зоз „Влашскима танцами”, „Чочеком”, „Мадярскима”, „Бунєвацкима танцами”…
У тих рокох часто даґдзе були госци, у Мадярскей ше участвовало на першим Фестивалу Руснацох, а скоро як дома були и у тедишнєй Чехословацкей, потим Ческей и Словацкей. Єст превельо памятки на прекрасни часи. Сами путованя остали запаметани по веселим дружтве, писнї и шпиванки… А и шора ше мушeло знац и тримац, бо танєчнїки представяли нашу жем звонка гранїцох.
Дом бул преполни з аматерами
– Скоро нароком зме дакус позабували и проби, окреме теди пред путованьом, а танцовали зме з таким ритмом и темпом же зме ше после законченя шицки шором мушели преблєкац до сухого облєчива. Нє раз ше случовало, кед зме себе дакус дали на душу, же ше дому пошло аж рано, та хто кадзи, чи на роботу, чи до школох, алє нїкому то нє завадзало. Могло ше, була то младосц, були зме полни з енерґию, сцелосцу и жадни дружтвеного живота котри зме сами на найкрасши способ формовали и орґанизовали – гвари Беґи.
У тих часох, добре паметам и я, Дом култури бул таки полни же скоро од рана до позних вечарших годзинох було так же накадзи ше єдна ґрупа виступела, такой друга мала пробу, а дзе ище шпиваче, дзецински танєчни ґрупи… Просто поведзено – „варло” од активносцох, а то и дало числени вершински резултати.
Основну школу Владо закончел у Керестуре, а штредню за обробок металу у Оджаку. Припадал тедишнєй ґрупи од котрих пецеро страдали у транспортним нєщесцу у Лалитю. Одтеди прешли трицец шейсц роки, алє пайташе котри страдали и тераз нєзабути.
Школа прешла, и почало ше робиц
– Вшадзи зо мнє було, од „АБЦ” хладзальнї, до погосцительства и керестурскей „Русалки”, Кооперативи… Ушлїдзели и даскельо роки у Бачким Маґличу, перше у млєкарнї, а потим у фабрики чипсу. Могло ше и старчело. Тераз сом ше якош уж длугши час становел у вербаским „Карнексу”, та, кед же ше дацо нє случи, отадз пойдзем и до пензиї – гвари вон.
Я особнє Владу Беґия запаметал и по тим же дому зоз Маґличу приходзел на бициґли. Гварел лєм єдну просту и обичну ствар: ,,А иншак бим путовал около наоколо, и у путованю претрацел пол дня, а так сом скоро часом, путуюци попрейґа по валалох, бул у Керестуре”.
Иншак, Владо бул рок и пол хореораф у Маґличу.
Нїґда нє могол мировац
Нємирного є духа, та му и у Маґличу нє дало мира кед похопел же прешло коло дванац роки як замарли шицки активносци у култури и нє могол витримац…
– Од дзверох до дзверох сом ходзел, прешвечовал, прешвечовал, нагварял, и цо шицко нє, алє на концу ше ми и поспишело. Перше почала робиц фолклорна секция. У мнє шерцо росло, а цешел сом ше як мало хто. Фолклор активни и нєшка, но тераз ансамбл уж водза професийни людзе. Добре же так почало. То ище єден зоз шлїдох котри за нами оставаю – прешвечени Джуджар.
И уж кед о танцу, муши дзешка буц зазначене же Беґи єден час танцовал и у кулским КУД „Иван Сенюк”, а после нє малей павзи, там дзешка коло пейдзешатей „Червеней ружи”, танцовал и зоз керестурску ґрупу ветеранох, з истима, скоро з тима зоз котрима танцовал и децениями пред тим. Нажаль, тедишня ґрупа уж давно остала без двох членох, алє и тераз, ту и там, присутни Кимо Стрибер, Янко Рускаї, Натка Емейдийова, Веселка Данкова, Лариса Дудашова, Лїляна Кирдова… Шицко то помали бляднє. Гваря же и то природа стварох, роки робя свойо як червоточ у древе.
– Мойо родичи, мац Амала и покойни оцец Миронь, роками були у Доме култури. Мац танцовала у теди вельким ансамблу котри надроснул и Керестур и Општину и вельо ширше. Оцец Миронь грал на гармоники. У култури ше и упознали, у култури я предлужел и шицким було добре найкрасши роки препровадзиц у дружтве блїзких и милих – гвари Владо Джуджар, Беґи и нє става з бешеду.
– Думам же зме до Дому култури нє ходзели лєм пре танєц, було там и роботни акциї, вше кед требало, дружели зме ше у валалє на шицки боки, а зоз наших танєчнїкох леґинє часто були и дружбове. Аж ше и тераз спомина же кед ми, як колектив були на даєдней керестурскей свадзби, то було дожице за приповедку за цали валал и нє преставало ше о тим приповедац, а вше найкрасше як мож. Озда зме так и заслужели – гвари на концу Владимир Джуджар Беґи.
Беґайлово
– Кед це интересує же одкадз нашей фамелиї назвиско Беґайлово, справди нє знам, алє и моя мац гвари же то лєм по оцови остало. А Беґайлов бул, гваря, ище оцов чукун, лєбо и дальши дїдо. До нашлїдства ше ми од оца ушло и тото, и мило ми – гвари Владо.
Амала и Миронь Джуджарово маю тройо дзеци, Найстарши Владо, а ту и брат Дзвоно, и шестра Оливера одата у Регака.
