Диґитализованє прешлосци и будучносци

автор борис варґа
1.1k Опатрене

„Добре, на кельо адреси вам у „Руским слове” треба послац мейл же бисце го достали?” – опитала ше ми у франти з єдней нагоди, єдна руска активистка. И тото питанє було цалком на месце. Бо, донєдавна до редакциї „Руского слова” сце могли послац на єден общи мейл, або на вецей приватни мейли новинарох и редакторох.

Од того числа „Руского слова” тото ше меня и уводзиме службово мейли за кажду рубрику, як цо то пракса у каждих углядних медийох. Кед маце даяку информацию за нас, сцеце дацо дополнїц, похвалїц, або виправиц и реаґовац, треба же бисце лєм з бокох рубрикох, горе у правим углє лайсночкох, преписали мейл адресу.

То ище єден з крочайох диґитализованя одношеньох зоз читачами и отвераня „Руского слова”.

Медзитим, ище вельо того по питаню реалного диґитализованя у „Руским слове” нє зробене. О даяки пейц роки, информациї и статї „Руского слова” и „Рутенпреса” найвецей ше будзе читац прейґ интернета и на ґаджетох. Тота будучносц будзе худобна без уключеней до себе диґиталней прешлосци.

Означованє 90-рочнїци друкованого новинарства по руски 2014. року дочекали зме зоз новим форматом „Руского слова”, як часописом у фарбох, и проґресивну аґенцию „Рутенпрес”. Окрем того же зме сами себе похвалєли, у Установи нє було векши пременки котри бизме могли славиц як крочай з часом напредок.

Нєодлуга, 2024. року, пред нами будзе ище векши ювилей – вик друкованого новинарства по руски. До його означованя „Руске слово” би мушело войсц зоз, у значней мири, диґитализовану архиву новинох, часописох, кнїжкох и фотоґрафийох.

То одвичательна, нєпроста, длуга и драга робота. За ню треба окремни средства, технїка, сервери и анґажованє нових людзох.

То би мушело буц у нашей новей „Стратеґиї Руснацох за 2020–2030. рок”, бо без скенираней и диґитализованей архиви, прешлосц заєднїци нє будзе доступна читачом и яґда єй нїґда анї нє було. 

Пишце нам – redaktor@ruskeslovo.com

ПОВЯЗАНИ ТЕКСТИ