Веселинка – фестивал дзецинскей творчосци Руснацох Войводини – официйна назва, а цо наисце „Веселинка”? Цо єй сущносц?
У будинку и на дворе Руского културного центра у Новим Садзе, у першей половки юния 2001. року першираз отримани фестивал „Веселинка”, a задумани є нє лєм як представа, лєбо святочни концерт, алє як место дзе ше дзеци пополадню зиду, побавя, попию сок, поєдза даяку лакотку. Задумани и реализовани активни роботнї, дзе нашо поетове представяли свойо кнїжки за дзеци, дзе ше указовало фолклорни крочаї, дзе ше зоз одрутних предметох правело бабки, дзе ше зоз крейдочками рисовало по вельким швижо обилєним муре нашей старей добрей Матки, дзе нам транспортна полиция нарисовала дражки и пешацки преходи на дворе и указовала дзецом як ше преходзи улїчку, дзе зме направели вельо цеста у фарбох и зоз розвалками и мустрами правели колачики, дзе ше могло одпатриц найновши представи за дзеци РНТ „Дядя”… И могло би так шоровац ище барз вельо креативни роботнї за прешли 25 роки, а вшелїяк би дацо остало вихабене. Тиж так, за дзеци котри тот дзень були у дзеки нє робиц нїч дало ше им на дзеку оганяц ше, бавиц ше зоз балонами, на джмурки, лєбо єдноставно могли ше лєм припатрац цо робя други. И одпочинуц на даєдней лавочки, лєбо ґарадичи пред святочну програму.
Програма на отвореней бини, под рефлекторами, задумана як колаж програми яки ше орґанизує коло секцийох и котри порихтали новосадски дзеци котри до Матки поряднє приходза на фолклор, лєбо шпиванє и котри ходза на годзини руского язика до новосадских школох. Уключени вше и предшколски дзеци. Госци зоз шицких наших дружтвох участвовали зоз тим цо найлєпше знаю робиц, чи то шпиванє, рецитованє, танєц, лєбо гранє на инструментох. Госци нам були и зоз других дружтвох, других народох – були Греки, Словаци, Роми, потим дзеци котри вежбаю ритмику у Партизану, сучасни танєц у Танєчней школи „Фокси”, а традицийно концерт закончує дзецинска фолклорна ґрупа КУД „Соня Маринкович” з Нового Саду.
Можебуц дахто пове: „Можеш думац, фестивал як и кажди други” и нє будзе мац анї кус право. Поента, як и мено фестивалу, то дац дзецом єдно шлєбодне пополаднє, кед ше можу побавиц, научиц дацо нове и упознац ше зоз велїма новима товаришами. Дац дзецом най буду дзеци и же би наисце нє були под прициском. Час таки же нам дзеци маю вельо обовязки, а и родичи тиж.
У вельким варошу кажда активносц подрозумює обовязку, привесц на авту (дзе найсц паркинґ!), лєбо на автобусу, дочекац, одвесц, и уж ше пожнї на даяку другу обовязку. При концу дня и дзеци и родичи вистати, без дзеки, а о шпиваню, лєбо танцу анї подумац.
Прето наша „Веселинка” ту, тот єден дзень у року кед ше можу и родичи и дзеци опущиц, побавиц и подружиц. Мами и татове най попию кафу, знаюци же ше о дзецох остараю воспитачки, учительки, хореоґрафове и шицки нашо уж одроснути Веселинчата, котри дзечнє помагаю у орґанизациї и меркую на учашнїкох.
Потирвала „Веселинка” 25 роки, преґурало ше чежки роки, безпенєжни, карантински и вшелїяки, наисце було и дакус скромнєйше, и дакус цеснєйше у Матки, алє вше було иновативно, креативно и весело…
Того року ше намагаме здогаднуц шицких потерашнїх „Веселинкох”, прераховац цо шицко поробене и на чим ище маме дац вецей моци, чийо таланти и схопносци потримац и указац.
Жадам „Веселинки” ище вельо роки, най рошнє, най ше меня так як то час и нови способ живота приноши.
А нашим дзецом – Веселинчатом жадам же би були ДЗЕЦИ и же би були ВЕСЕЛИ!