РУСКИ КЕРЕСТУР – Стреду, 16. януара отримане перше едукативне викладанє у рамикох Жимскей паприґарскей школи котру орґанизує Здруженє продуковательох паприґи „Капсикум анум”.
Викладанє було лєм едуктивного характеру, без промовованя и рекламованя було котрей компаниї. Фахови викладач бул мастер инжинєр Воїслав Чудомирович, а спред компаниї „Lukowa” присуствовал менаджер Небойша Аджич, як и представнїки орґанизациї USAID, спред Канцелариї за локални економски розвой општини Кула, Єлена Сивч.
Викладнє було подзелєне до пейцох цалосцох – применьованє ҐЛОБАЛ ҐАП стандардох, орґанска продукция, модерна продукция и технолоґия, злєпшанє продуктивносци, и здравствени и мири безпечносци за очуванє околїска и доставанє здравого плоду.
Едукация ше реализовала прейґ USAID проєкту за конкурентну привреду, а Руски Керестур єдно спомедзи 15 местох у нашей держави дзе ше го реализує. Едукациї потераз отримани у пейцох местох, а у плану им нащивиц ище 12.
Компания „Lukowa” занїма ше насампредз зоз преробком овоци и желєняви, а свойо продукти пласує на домашнє и иножемне тарґовище. Едукациї орґанизує пре подзвигованє свидомосци о ефикасней польопривредней продукциї з почитованьом стандардох, цо оможлївює лєгчейше пласованє польопривредних продуктох на иножемне тарґовище.
Попри тим, по законченю викладаня, Аджич представел и можлївосц сотруднїцтва, и интересованє за керестурску паприґу. Наявел же по конєц фебруара, вєдно зоз предсидательку Здруженя, Оросову, розпатра и догваря одкуп паприґи за наступну сезону, а иснує аж и можлївосц контраченя.