БЕОҐРАД – Концом прешлого тижня, штварток 28. мая, Влада Републики Сербиї усвоєла Акцийни план за витворйованє правох национaлних меншинох у периодзе од 2026. по 2029. рок.
Акцийни план за витворйованє правох националних меншинох за период од 2026. по 2029. рок облапя обласци котри значни за витворйованє правох националних меншинох, як цо то култура, образованє, информованє, и службене хаснованє язика и писма, цо и штири обласци котри директно у инґеренцийох националних совитох националних меншинох. Попри тим, у Акцийним плану ше спомина и ровноправне участвованє националних меншинох у дружтвеним живоце Републики Сербиї и забрана дискриминациї, а применьованє одреднїцох зоз того документу би мало допринєсц моцнєню институцийного рамику и применьованя меншинских правох у цалосци.
Документ пририхтани у сотруднїцтве зоз Координацию националних совитох националних меншинох, так же шицки национални совити могли участвовац у його виробку, алє и представнїки цивилного сектору и фаховей явносци, а согласносц на Акцийни план дала и Европска комисия. Пред роком, шицки национални совити дали свойо предкладаня на питальнїкох зоз 70 тезами зоз шлїдуюцих обласцох – забрана дискриминациї, култура, медиї, шлєбода виросповиданя, службене хаснованє язика и писма, образованє, демократска партиципация, обезпечованє роботи, национални совит, совити за медзинародни одношеня, економски розвой, медзинародне сотруднїцтво.
Прилапйованє Акцийоного плану то часц сполньованя обовязкох у предприступним процесу Сербиї до Европскей униї.