РУСКИ КЕРЕСТУР – Всоботу, 23. априла, у керестурскей Спортскей гали отримани спортски дзень, на хторим коло 100 млади бавели одбойку, фодбал, бадминґтон, столни тенис, „вратара”, а и танцовали.
Спортски дзень орґанизовал Каритас, у сотруднїцтве з Рухом Фоколарох з Беоґраду, а потримала го Месна заєднїца Руски Керестур. Стретнуце орґанизоване пре спознаванє духовного боку спорту, упознаванє свойого цела и характеру, а учашнїком поручене же побиднїк дакеди муши знац и страциц.
Участвовац могли шицки заинтересовани, а одволали ше углавним школяре основних и штреднїх школох з Кули, Панчева, Суботици, Беоґраду, Нового Саду и Горнього Брегу. Побиднїки достали символични награди, хтори могли и подзелїц з другима, цо у складзе з характером тей манифестациї.
Окрем змагательней часци, учашнїки мали и шлєбодни час за друженє, а на концу були и на Служби Божей у керестурскей церкви.