35 роки роботи русинистики на Филозофским факултету у Новим Садзе

автор др янко рамач
1.1k Опатрене

Катедра за руски язик и литературу, нєшка Оддзелєнє за русинистику, на Филозофским  факултету у Новим Садзе, наполнює 35 роки роботи, а то дзешка просекови роботни чловеков вик. То добра нагода у найкратших рисох спатриц дїялносц, место и улогу Катедри/Оддзелєня у руским науковим, просвитним, културним и явним живоце, та и ширше.

У юнию велї матуранти роздумую цо далєй, чи предлужиц школованє и можебуц ше уписац на факултет, и на котри. Обставини у держави зложени, и зоз факултетску диплому нє лєгко найсц роботу. Заш лєм, тримаме же потребне, голєм кратко, повесц дацо о уписованю на Катедру, о студийох на нєй и о єй дїялносци.

На Основних академских студийох єст штири места за студентох котри буду на буджету и 11 места за самофинансуюцих, а на Мастер академских студийох штири места на буджету и шейсц самофинансуюцих. На Филозофским факултету єст можлївосц уписац докторски студиї и вибрац тему за дисертацию з обласци русинистики. Правда, критериюми на упису досц строги, студиранє драге, а студиї подрозумюю нє лєм обласц русинистики, алє и ширше славянску филолоґию.

Акредитованє студийних програмох по Болоньскей системи од 2008. року принєсло, и нєпреривно приноши, вельо новосци у студираню. Важни нови момент – преходносц и припознаванє дипломох у системи болоньских студийох, цо значи, вельо лєгчейше преходзенє под час студийох з єдного на други универзитет, кед програми подобни, и припознаванє и нострификованє дипломох збодутих у державох котри прилапели тоту систему.

У новшим чаше ше отвераю велї можлївосци рухомосци студентох и наставнїкох по рижних медзинародних програмох. Так, по програми „Еразмус плус” студенти маю можлївосц єден семестер препровадзиц и студирац на других универзитетох. Новосадски универзитет и Филозофски факултет у Новим Садзе маю подписани догварки о таким сотруднїцтве з численима универзитетами, односно факултетами у Европи. Стипендиї за таке студиранє у другей жеми вецей як пристойни за нашо условия. Тиж так єст можлївосци за госцованя наставнїкох, цо подрозумює одредзени фонд преподаваньох у єдним семестру на других универзитетох. Катедра таке сотруднїцтво уж почала зоз универзитетами у Пряшове и Ґданьску, алє єст можлївосци и за одход на други универзитети, до Кракова, Вроцлаву, Брну, Банскей Бистрици.

Указало ше же Катедра за руски язик и литературу интересантна за студентох славистики и професорох з других универзитетох. Даскельо студенти з Польскей и Словацкей по єден семестер препровадзели на Катедри, а мали зме и професорох з иножемства котри у нас тримали преподаваня. Перши искуства у тим поглядзе барз добри, а смисел и ефекти рухомосци студентох и наставнїкох вельозначни: можлївосц студирац, або слухац преподаваня котри студенти нє маю на матичним факултету, упознаванє способу студираня, односно викладаня, у других универзитетских центрох, здобуванє и преношенє искуствох, здобуванє других видоглядох, установйованє контактох и сотруднїцтвох, цо барз важне як за младих людзох – студентох, так и за наставнїкох. Найкратше поведзене, то повязованє интересантного и хасновитого.    

Од самого початку Катедра мала вецей значни функциї: виховйовала просвитни кадри за руски школи, а з єй диплому велї находзели роботу у медийох на руским язику и на велїх других местох значних за културни и национални живот Руснацох на тих просторох. Друга значна функция Катедри, нєшка Оддзелєня за русинистику – наука. И на тим полю за три и пол децениї посцигнути значни резултати. Академик Юлиян Тамаш у єдней нагоди гварел же даскельо члени Катедри на полю русинистики зробели роботу котру дакеди и вельо векши тими даєдних наукових институтох нє поробя и за длугши час. А факт, же за студентох обезпечени адекватни учебнїки з русинистики и ширша литература, а написани и капитални дїла з обласци рускей литератури, язика, историї, култури итд.

Нажаль, видзи нам ше же робота Катедри/Оддзелєня за русинистику нєдосц позната ширшей рускей явносци. Робота, велї акциї, успихи и анґажованя Катедри/Оддзелєня и єй членох нєдосц, або анї нє присутни у руских медийох. Лєгко глєдац причину такого стану и виноватих, алє лєпше будзе кед ше ми вєдно з медиями потрудзиме пременїц го. У тей нагоди голєм тегеґрафски спатриме даєдни обласци дїялносци и можлївосци анґажованя нє лєм у узко рускей сфери, алє и ширше, у жеми и иножемстве.

Од осемдзешатих рокох прешлого вику члени Катедри за руски язик и литературу участвовали на рижних наукових конференцийох у жеми и иножемстве. Вельо би було спомнуц шицки универзитетски центри у Европи и ширше, та наведземе лєм даскельо держави: ЗАД, Канада, Нємецка, Австрия, Ческа, Словацка, Польска, Мадярска, Україна, Естония, Русия, Турска, и розуми ше, жеми на просторох дакедишнєй Югославиї.

Як учашнїка на наукових конференцийох часто ме нєсподзивйовало и радовало, кед сом ше прешвечовал же у славянским науковим швеце о нас Руснацох досц знаю, дакеди аж и глїбше и ширше од того, як ше на велї ствари патри у нашей заєднїци. Друге нєсподзиванє и задовольство було, кед по пречитаних рефератох  „руске питанє” отверало плодну дискусию.

На Филозофским факултету у Новим Садзе шицки студенти маю можлївосц учиц руски язик як иножемни, два або штири семестри. У новшим чаше каждого року ше формую по два ґрупи (од 25–40 студентох) котри уча руски язик. За Катедру за руски язик и литературу, алє и за цалу руску заєднїцу, значне же кажди рок векше число студентох нє Руснацох уписує и учи руски язик на универзитетским уровню. Студенти Филозофского факултету, Руснаци, маю можлївосц учиц на Катедри руски язик як свой мацерински язик. Тоти цо у основней, або стреднєй школи учели руски язик можу предлужиц його усовершованє на универзитетским уровню, а тоти цо нє мали можлївосц скорей учиц свой мацерински язик, можу то вихасновац под час студийох. Знанє руского язика и описменєносц на нїм барз значни фактор у чуваню националного идентитету.

Становиска висловени у тим тексту виключно авторово и нє вше одражую ушорйовацку политику новинох „Руске слово”.

ПОВЯЗАНИ ТЕКСТИ