Прешло ище єдне вельке церковне швето, Сошествиє Святого Духа, у народзе познатше як Русадля, а звичайно то источасно и дзень кед ше у Бикичу отримує їх найвекша валалска културна манифестация под назву „Пришли нам Русадля”. А основа манифестациї то зрубованє „майового древа” хтору ше уж роками пестує у тим нашим валалє.
Бикичанє од забуца „отаргли” єден дакедишнї обичай, хтори принєсли зоз старого краю кед леґинє вноци вочи першого мая з лєса приношели найвисше древо и закоповали го опрез хижи даєдней дзивки у валалє. И так древко ту було по швето Русадля кед ше го на шветочни способ зрубовало. Танцовало ше и шпивало з тей нагоди, а домашнї вигосцели присутних. Бикичанє уж роками тот обичай пестую так же древко „садза” у центру валала опрез етно хижи, дакус го прикраша, а зрубую на Русадля.
У рамикох манифестациї ше уж роками рихта и етно штанди здруженя женох зоз општини Шид, та так було и того року, а пришли аж и жени зоз Руми зоз Здруженя „Милева Марич”. Потим шлїдзел концерт у Доме култури хтори орґанизує КПД „Иван Котларевски”, як и сама манифестация вєдно зоз Здруженьом женох „Бикичанки”. Того року бул богати концерт, а окрем домашнїх наступели и госци ГКУД „Шид”, „Филип Вишнїч” з Вишнїчева и „Милан Растислав Щефанїк” зоз Бинґули.
Порихтана удатна уметнїцка програма з венчиком рижних шпиванкох и танцох, а потим шлїдзело зрубованє древка коло хторого ше перше шпивало и танцовало. Як и каждого року, були и представнїки других дружтвох од блїжей и далєй, а того року и делеґация КУД „Осиф Костелник” зоз Вуковару. На концу ше шицки вєдно дружели на коктелу. Бикичанє ознова були добри орґанизаторе манифестациї, а и добри домашнї. Праве Бикичанє и манифестация хтору орґанизую приклад як мож зачувац традицию од забуца, а источасно порихтац єдну красну културну манифестацию. Скоро уж 20 роки ю Бикичанє орґанизую, вибудовали добри фундамент, а помали ше до орґанизациї вше вецей уключую младши моци як цо „бикичски нєвести”.