КРИВАЯ – Предсидателька влади Ана Брнабич отворела нєшка першу диґиталну фарму у Сербиї и реґиону, у Криваї при Бачкей Тополї, котра польопривреднїком оможлїви же би безплатно и „з першей руки” научели як зменшац ризики у продукциї, трошиц менєй води и гною и уложиц менєй средства, а достац векши урожай.
Премиєрка поручела же отверанє диґиталней фарми указує же Сербия лидер у реґиону и же може постац лидер у Европи кед слово о диґитализациї и нових технолоґийох у польопривреди.
-Же бизме затримали лидерску позицию, мушиме бежац швидко, найшвидше як можеме, гварела Ана Брнабич. У тим смислу, додала же цо скорей треба вибудовац будинок Института „BioSens”, котри будзе европски наукови центер. До ньго Влада уложи 14 милиони евра, додаваюци же важне же би ше закончело проєктну документацию и цо скорей почало вибудов.
Тиж, наглашела премиєрка, потребне повязац бази податкох у польопривреди же би ше приношели ефикасни одлуки на основи шицких доступних информацийох.
Прето Влада одлучела основац роботну ґрупу, на чиїм чолє министер польопривреди. Шеф Делеґациї ЕУ у Сербиї Сем Фабрицки визначел же польопривреда у Сербиї важни порушовач и фактор розвою, и же у прешлих шейсц-седем рокох вивоз польопривредних продуктох зоз Сербиї два раз векши.
ЕУ предлужи потримовац Сербию у иновацийох, през проєкт „Horizons 2020”, як и потримовку сербскей польопривреди през ИПАРД програму, з котру ше обезпечи 175 милиони евра потримовки.
Диґиталну фарму обдумал Институт „BioSens” зоз Нового Саду у сотруднїцтве зоз Польопривредним продуковательом „Кривая”, у рамикох проєкта ANTARES, котри вєдно финасую ЕУ и Влада Републики Сербиї.
Фарма ма физичну часц – сучасну опрему, алати и механїзацию, алє и виртуелну часц, котру твори платформа AgroSens за провадзенє шацох котру польопривреднїки хасную од октобра.
През платформу польопривреднїком безплатно доступни сателитски знїмки Европскей вселенскей аґенциї зоз котрей на кажди пейц днї мож достац знїмок парцели, на основи котрей виглєдоваче „BioSens” института даваю звит о стану шацох.
Мож достац и барз точну проґнозу хвилї за одредзену локацию, як и метеоролоґийни податки о тим кельо води акумуловане на парцели.