У континуитету сто роки

автор О. Планчак Сакач
185 Опатрене

На инициятиву, хтора пришла зоз священїческих и адвокатских кругох уж оформеней рускей интелиґенциї, точно пред сто роками, 4. децембра 1924. року, обявени перши „Руски новини“, на народним язику бачванко-сримских Руснацох. Була то теди европска, барз напредна идея и закладанє, бо ше през новини руска заєднїца по першираз медзисобно повязала и умрежела.

Тоти перши „Руски новини“ у котрих нашо людзе  на своїм язику могли пречитац висти зоз жеми и швета, були початок нашого културно-просвитного просперитету, бо у тих новинох по першираз бул обезпечени и простор дзе ше обявйовало и литературни твори. Зоз тей идеї и пракси вирошнє наша видавательна дїялносц, а тот глїбоки фундамент будзе основа на котрей ше познєйше вибудую нашо институциї.

У сторочним континуитету зменьовали ше держави и идеолоґиї, а новини виходзели у рижних форматох, алє вше як тижньово новини. У нїх ше насампредз писало о шицким цо було релевантне за руску заєднїцу, шицко цо ше случовало у нашим дружтвеним, политичним, духовним, културним, просвитним и спортским живоце наших согражданох.

Новинарска професия на початку була будована на ентузиязму и дзеки поєдинцох, а зоз формованьом новей держави Югославиї, после Другей шветовей войни, „Руске слово“ ше формовало до Установи. Новини достали свойо сиґурне жридло финансованя, бо бриґу о тим превжала нова держава. Пременєла ше идеолоґия, та з початку уплїв бул векши, алє помали зоз прецеком часу и тото ше пременєло.

Новинарска професия ше пейдзешатих рокох професионализує. „Руске слово“ нє лєм як новини, алє и як Установа, у хторей уж будзе розвити и сеґмент видавательства, свойо златни часи будзе жиц седемдзешатих и осемдзешатих рокох. Кризу дзеведзешатих, зоз воєним окруженьом и инфлацию, будземе дзелїц з векшинским народом, а зоз приходом нового милениюма и демократиї ознова шицко ожиє и достанє свою цалосну форму.

Буц Рускословец то и велька чесц и велька одвичательносц у чуваню язика, писма, националней култури и нашого идентитету. Вимага вельку одвичательносц у чарних шлїдох на билим паперу, хтори зохабяме за историю, за будучносц, бо стоїме медзи двома вичносцами, медзи прешлосцу и будучносцу хтора будзе оценьовац и преверйовац нашо доприношенє. Кед сом пришла до Редакциї „Руского слова“ у нєй були сами хлопи, нєшка тоту професию превжали жени, алє я лєм штварта главна и одвичательна редакторка у тих сто рокох новинарства.

Континуитет руского друкованого новинарства ше предлужує у одпочинаню його другого вику. Най би младши ґенерациї, хтори приходза после нас, предлужели и уписали ше до тей историї нашого тирваня и иснованя, ту на тих просторох дзе охабяме наш шлїд уж три вики. На многая и благая лїта!

ruske.redaktorka@gmail.com

ПОВЯЗАНИ ТЕКСТИ