ДЮРДЬОВ – У Месней заєднїци стреду, 17. децембра директор Дома здравя Жабель, Никола Якшич бешедовал зоз гражаданами Дюрдьова на тему здравства, роботи дюрдьовскей амбуланти и Дома здравя Жабель.
Примарна тема о котрей ше бешедовало була педиятрия, односно чом Дюрдьовчанє ознова нє маю стаємно занятого педиятра у валскей амбуланти.
Вецей як два роки, три раз до тижня, на педиятриї у дюрдьовскей амбуланти робела дохторка общей пракси Драґица Иванич, котра нє роби од 8. децембра, понеже пошла на специялизацию зоз обласци педиятрия.
Ситуация котра додатно звекшала тот проблем и тото же дохторе хасную рочни одпочивки, як и епидемия вирусних инфекцийох, а найвецей хорих школярох и дзеци зоз прешколскей установи єст у Дюрдьове и Жаблю. Прето, остатнї два тижнї, дохторе педиятриї и общей пракси часто препатраю вецей пациєнтох, и дзеци и старших, як цо то предписане по Закону.
После вецейгодзиновей розгварки, велїх питаньох и одвитох, директор Якшич обецал, медзи иншим, и же би ришенє могло буц кед би дохторе кажди дзень препатрали дзеци у дюрдьовскей амбуланти або на общей пракси, або на педиятриї.
Предложене и же би три раз до тижня дюрдьовски дзеци препатрала педиятер др Єлица Дувняк, пезионерка котра вецей роки анґажована у Дому здравя Жабель, а два раз до тижня дохторка общей пракси Саня Тривунович, котра би ше перше мушела обучиц при др Дувняк, а аж вец почала самостойно робиц з дзецми. Попри тим, кед нєт дохтора на педиятриї у дюрдьовскей амбуланти, родичи маю право одвесц дзецко на препатрунок на общу праксу до амбуланти у Дюрдьове.
Препатрунки у амбуланти у Дюрдьове и Дому здравя Жабель починаю на седем годзин, а перша змена тирва до штернац годзин. Тото важне, прето же, як директор Якшич гварел, уж було пригварки на роботу занятих у дюрдьовскей амбуланти. Гражданє зауважели же ше зоз пациєнтами нє почина робиц на час и часто ше нїхто нє явя на телефон о чим ше и сам директор прешвечел.
Вчера, 18. децембра у дюрдьовскей амбуланти, на педиятриї робела др педиятриї Єлица Дувняк, алє уж нєшка, 19. децембра на педиятриї нєт анї дохтора анї педиятрийскей шестри.
