РУСКИ КЕРЕСТУР – После вилїйовей вечери и колядованя стреду, 24. децембра у храму св. оца Миколая, вєдно зоз владиком кир Георгийом Джуджаром, домашнїма священїками и госцами у Керестуре почало преславйованє народзеня Спасителя Господа нашого Исуса Христа.
Шпивачох було вельо менєй як прешлих рокох, бо цали дзень попадовал диждж. Домашнїм дзецом то нє завадзало, та по Саночне було чуц коляди по улїцох.
На крачунским Саночним, хторе було на 23 годзин було вельо вирних, предводзел го наш епарх преосвящени кир Георгий Джуджар, а зоз нїм служел о. Владислав Варґа, мр. о. Дарко Рац, о. Владимир Медєши, о. Владимир Еделински Миколка и о. Ярослав Варґа.
Преславйованє Рождества Христового предлужене штварток, 25. децембра зоз Архиєрейску службу Божу хтору предводзел владика кир Георгий, о. Владислав Рац, о. Владислав Варґа, о. Владимир Медєши, о. Ярослав Варґа, о. Михайло Режак, о. Дамян Кича ЧСВВ, єромонах о. Платон Салак ЧСВВ и о. Алексий Гудак.
Под час цалей Архиєрейскей служби Божей шпивал дзияк керестурски Янко Виславски и Хор Прокатедралней церкви Успения Пресвятей Богородици зоз Коцура, хторому дириґовал Александар Планкош.
На Вилїю, стреду, 24. децембра през дзень велї пошли на теметов, як то уж обичай однєсли житко, помодлєли ше и запалєли швички своїм покойним.
