РУСКИ КЕРЕСТУР – Члени Здруженя професийних вожачох камиона Пайташ з драги (Друг са друма) и того року, точнєйше вовторок, 23. децембра нащивели наймладших у Руским Керестуре хторим, з нагоди наиходзацих шветох, подзелєли пакецики, лакотки и други новорочни дарунки.
Гуманитарна акция часц їх традицийней жимскей акциї Конвой зоз шерцом, хтору орґанизую по шести раз, а зоз своїм оквиценим огньогасним камионом, Здруженє Пайташ з драги, през Керестур провадзело и домашнє Добродзечне огньогасне дружтво.
Конвой зоз крашнє оквиценима камионами рушел внєдзелю, 21. децембра зоз Бечею и аж по 7. януар будзе обиходзиц числени места по Войводини и Сербиї.
На тей драги, волонтере и учашнїки подзеля коло 1500 пакецики дзецом їх колеґох, професийних вожачох, хтори чежко хори або хтори настрадали у транспорту, алє и дзецом зоз почежкосцами у розвою або зоз социялно загрожених фамелийох.
Конвой камионох 22. децембра обишол Зренянин, Кикинду и Суботицу, вовторок були у Зомборе, Червники и Кули, а после Керестура предлужели до Оджаку, та далєй по других местох Войводини.
