ДЮРДЬОВ – По словох директора Дома здравя Жабель Николи Якшича, як вчера вечар сообщел за Рутенпрес, од нєшка, пондзелок 22. децембра у амбуланти у Дюрдьове, на оддзелєню педиятриї першу змену будзе робиц др общей медицини Зорица Делич зоз Чуроґу, котра роби и у тамтейшей педиятрийней амбуланти уж пол рока.
Директор Якшич гварел и же ше планує же др Делич на оддзелєню педиятриї у Дюрдьове будзе робиц кажди роботни дзень, у першей змени полни роботни час по шлїдуюцу стреду, односно по 31. децембер.
Най здогаднєме, на оддзелєню дюрдьовскей педиятриї нєт стаємно занятого педиятра од кеди др общей медицини Драґица Иванич, котра на тим роботним месце робела вецей як два роки три раз до тижня, пошла на специялизацию 8. децембра. Ґу тому, у дюрдьовскей амбуланти позарядови стан, як и у других општинских местох, прето же остатнї мешац тирва епидемия вирусних инфекцийох, а найвецей хори дзеци зоз основней школи и предшолскей установи.
Од того тижня, пре хорованя и рочни одпочивки, у Дому здравя Жабель єст тройо дохторе на педиятрийней служби котри треба же би препатрали дзеци у штирох педиятрийних амбулантох, у штирох местох општини. Прето, найвироятнєше же ище єден час будзе пременки, та и на дньовим уровню, кед слово о орґанизациї роботи педиятрийней служби у општинских местох.