РУСКИ КЕРЕСТУР – На ютре, штварток 18. децембра, будзе отримана длугочекана обука за польопривреднїкох о хаснованю средствох за защиту рошлїнох.
За отримованє обуки наявени овласцени фахово особи зоз Польопривредней фаховей служби Вербас и инспекторе зоз Управи за защиту рошлїнох.
Обука будзе отримана од 9 годзин, у ресторану „Три крунеˮ, ма тирвац пейц годзини, а на концу будзе орґанизоване и покладанє тесту за доставанє сертификату на 5 роки.
Министарство польопривреди, лєсарства и водопривреди – Управа за защиту рошлїнох започала запровадзованє обуки за хасновательох средствох за защиту рошлїнох, а зоз цильом же би ше на безпечни способ защицовало рошлїни и так очувало здравє людзох, животиньох и животного штредку.
Обуки запровадзую 32 овласцени правни особи и то польопривредни совитодавни и фахово служби, факултети и високи школи хтори основала Влада Републики Сербиї.
По законченю обуки и успишно положеного преверйованя знаня, достанє ше сертификат професийного хаснователя, хтори у наиходзацим периодзе будзе представяц условиє же би ше могло купиц средства за защиту рошлїнох.