РУСКИ КЕРЕСТУР – На порядней 41. Схадзки Националного совиту рускей националней меншини (НСР) котра була отримана вовторок, 12. децембра принєшени даскельо значни одлуки, а котри ше насампредз одношели на прерозподзельованє буджету за чечуци 2025. рок. За ребаланс гласали 11 од 12 присутних членох.
На схадзки присуствовали: предсидатель Стеван Самочета, Михайло Пашо, Наташа Макаї Мудрох, Мелания Мали, Славиша Сабадош, Желько Ковач, Олена Папуґа, Мария Дорошки, Михайло Фейса, Микола Папуґа, Микола Кухар, и Владимир Олеяр.
Буджет ше прерозподзельовало пре прилїв пенєжох зоз уровня АП Войводини, та так, першобутно було плановане же НСР у 2025. року будзе розполагац зоз 19 милиони 803 тисячи 740 динари, док зоз спомнутим ребалансом буджет виноши 20 милиони 364 тисячи 953 динари. Опредзелєни дополнююци средства за Руски народни театер „Петро Ризнич Дядя”, за преславу 260 роки образованя по руски у коцурскей ОШ „Братство єдинство”, и за позарядово награди шицким 18 стипендистом НСР и двоїм студентом першого и другого року на Оддзелєню за русинистику на Филозофским Факултету.
Потим дате позитивне думанє о кандидатки Весни Лисица за члена Управного одбору Дому школярох „Бранково коло” зоз шора родичох, цо предвидзене зоз Законом понеже на териториї Городу Нови Сад руски язик службени язик.
На концу схадзки потвердзени аж 14 одлуки Вивершного одбору котри принєшени скорей схадзки.
Потим, под точку рижне на инициятиву члена НСР проф. др Михайла Фейсу спомнуте и же би цо скорей формовац одбори, и же би шицки предсидателє одборох требали активно участвовац у писаню новей Националней стратеґиї, як и о тим же би ше ознова формовало роботни цела. Фейса предложел же би то були три роботни цела: за младих, за науку и за видавательну дїялносц. О тих предкладох нє гласане.
Як догварене, то була найвироятнєйше остатня схадзка НСР у тим року, а же найвироятнєйше идуца схадзка будзе у януару на котрей будзе слово о приношеню нового Правилнїка о стипендованю руских школярох. У складзе з тим, секретар НСР Таня Арва Планчак поволала шицких членох же би у писаней форми доставели свойо предклади за вименки Правилнїка, о чим ше будзе дискутовац на спомнутей схадзки.
