КОЦУР – Основна школа Братство єдинство зоз Коцура означела 260 роки образованя у нєй, а з нагоди того велького ювилею внєдзелю, 21. децембра, орґанизована и пригодна програма.
Означованє почало зоз Благодарну службу Божу котра предполадньом служена у Грекокатолїцкей церкви Успения Пресвятей Богородици. Служел ю декан бачки и парох коцурски о. Владислав Рац, котри ше у казанї огляднул на длуги вик и значносц образованя на нашим язику у коцурскей школи.
Друга часц програми означованя ювилею отримана пополадню у валалскей Библиотеки Данило Киш. У орґанизациї Рускей матки и КПД ДОК – Нови Сад отримана промоция сучасних руских и двоязичних кнїжкох школярох ОШ Братство єдинство. З тей нагоди бешедовал предсидатель Рускей матки проф. др Михайло Фейса, а свойо твори пречитали Силвестер Макаї, Славомир Шанта, Снежана Шанта, Татяна Колєсар, а бешедовал и професор др Юлиян Рамач и други. Вєдно ше здогадли и дакедишнїх учительох и наставнїкох у коцурскей школи, окреме Янка Фейси и професора Гавриїла Надя, а визначели и други значносци вязани за образованє на руским язику.
У Велькей сали Дома култури на 18 годзин почала Святочна академия з нагоди означованя ювилейних 260 рокох образованя у Коцуре. Присутних зоз пригоднима словами привитал и предсидатель Националного совиту Рускей националней меншини Стеван Самочета, як и парох коцурски о. Владислав Рац и предсидатель општини Вербас Милан Ґлушац.
Програма почала зоз гимну Боже правде и шветочну шпиванку Браца Русини котру одшпивали Хор грекокатолїцкей церкви Успения Пресвятей Богородици и школяре Основней школи, а шлїдзели точки котри були пошвецену историї и терашньосци образованя на руским язику у валалскей школи.
Окрем школярох, програму збогацели и Аранка Медєши и Дюра Макаї котри през драмску сличку бешедовали о тим як настава випатрала дакеди. Зоз бешеду, стихами и шпиванку орґанизаторе на пригодни и святочни способ означели тот вельки ювилей. На концу програми шицким подзековала и директорка Основней школи Сенка Мученски, и вєдно зоз оркестром за конєц одшпивали Писню Коцуру.
У голу Дома култури по законченю Святочней академиї присутни бешедовали и черали упечатки о програми пошвеценей ювилейним 260 роком образованя, коло сладких и сланих лакоткох котри приготовели членїци Активу женох КУД Жатва.
