НОВИ САД – Министерство науки, технолоґийного розвою и иновацийох Влади Републики Сербиї обявело Лїстину катеґоризованих наукових часописох за 2025. рок, чийо видавателє зоз Републики Сербиї, на котрей и у тим року Часопис за науку, литературу, културу и уметносц „Шветлосц”. Часопис вєдно видаваю НВУ „Руске слово” и Филозофски факултет з Нового Саду – Оддзелєнє за русинистику.
Часопис за науку, литературу, културу и уметносц „Шветлосц” по першираз катеґоризовани як М52 – домашнї наукови часопис за обласц язик и литература, цо значи же напредовал на лїстини.
Спрам библиометрийних параметрох, катеґоризация М52 значи визначни национални часoпис за науку. За гуманистични науки и часописи зоз лїстини Медзинародного комитету славистох – III катеґория.
Предходни шейсц роки, часопис „Шветлосц” бул катеґоризовани як М54 и М53 – домашнї наукови часопис за обласц сербски язик и литература.
У науково катеґоризованей „Шветлосци” свойо фахово роботи за остатнї шейсц роки обявели: др Йоаким Стрибер, др Юлиян Тамаш, др Янко Рамач, др Юлиян Рамач, др Олег Петрук, др Олег Румянцев, др Йосиф Вархол, др Даниела Тамаш, др Петер Женюх, др Богдан Гальчак, др Маряна Комариця, др Кристиян Екер, др Оксана Тимко Дїтко, др Ана Римар Симунович, др Александер Мудри, мр Славомир Олеяр, др Михаил Дронов, мср Мирослав Кевежди, мср Саша Сабадош, мср Єлена Дудаш, мср Марина Сакач, Любомир Медєши, Надїя Вархол, Ваня Дула, Наталия Ребрик, Милош Лекич, Смиля Вукотич, Лїляна Симич, Кристина Раяк, Ваня Бера, Зорана Чулибрк, Зинаида Будински и Микола М. Цап.
Часопис „Шветлосц” бул подполно змистово и визуално реформовани 2019. року, а теди му ґу назви додате же є виданє и за науку. Од 2023. року вєдно го видаваю НВУ „Руске слово” и Филозофски факултет з Нового Саду – Оддзелєнє за русинистику.