КОЦУР – Члени Мото-клубу „Пеґасус” зоз Коцура, у сотруднїцтве зоз Туристичну орґанизацию општини Вербас и численима спонзорами, и того року орґанизую „Дїдомразияду” у центру валала, котра будзе отримана на нєдзелю, 28. децембра.
Друженє зоз моторкашами пооблєканима до Дїдох Мразох будзе отримане на площи опрез Дома култури. З нагоди наиходзацих новорочних и крачунских шветох вони наймладшим подзеля лакотки, а ошвиженє будзе порихтане и за старших.
Орґанизаторе поволали шицких же би ше того дня прешейтали по центер валала, дружели ше и уживали у програми и числених змистох котри порихтали.
Окрем Мото-клубу „Пеґасус” и Туристичней орґанизациї општини Вербас, у орґанизованю подїї участвую и Општина Вербас, Месна заєднїца Коцур, Основна школа „Братство єдинство”, Етно клуб „Одняте од забуца”, КУД „Жатва”, Дом култури, Ловарске дружтво „Сокол” и Александар Суботин.
Початок „Дїдомразияди” заказани на 12 годзин.