РУСКИ КЕРЕСТУР – Традицийна Жимска школа польопривреди, у орґанизациї Плантарии Аґрар д.о.о. зоз Руского Керестура, отримана вовторок 16. децембра, у ресторану „Три крунеˮ, дзе позберала числених польопривреднїкох, заинтересованих дознац дацо нове од представнїкох компаниї „BASFˮ и „Cortevaˮ.
Представнїк компаниї „BASFˮ, Неманя Ивкович, найвецей бешедовал о иновативних ришеньох у защити сцернянкових житаркох, та о тим на яки способ людзе успишно можу защициц жито и од хоротох и корова.
Представнїки компаниї „Cortevaˮ – Никола Корач и Данило Вукичевич, бешедовали о – пестицидох тей компаниї, о средствох за защиту рошлїнох з акцентом на хербициди и фунґициди, насампредз у житу и ярцу.
Фаховци тиж препоручовали рижни гибриди кукурици, слунечнїку и сої, за тоту часц терену, и бешедовали о предносцох медзи нїма.
На концу заключели же и Кортевово и BASF-ово средства дакус драгши, алє ше у тим случаю плаци квалитет хтори ше после на урожаю враци.
