ОСЄК (ГОРВАТСКА) – У Просвитно-културним центре Мадярох Републики Горватскей (РГ), всоботу, 7. децембра отримане 21. стретнуце хорох и шпивацких ґрупох Руснацох РГ Дравски габи.
Хор домашнього КУД Руснацох Осиєк на початку програми одшпивал шпиванку Мой Осиєк зоз котру свойому городу повинчовали 239. родзени дзень. Потим госцох привитал предсидатель КУД Руснацох Осиєк Мирко Рибич, представнїк городоначалнїка Осєку Марко Елюґа, предсидателька Союзу Русинох РГ Дубравка Рашлянин и член Совиту за национални меншини РГ Звонко Костелник, котри отворел манифестацию.
У програми участвовали попри домашнього КУД Руснацох Осиєк, КД Русинох Винковци, Матица Словацка Осиєк, Руснак Дружтво Руснацох у РГ Петровци, КУД Яким Гарди Петровци, ЖВС Арсновиа Посавски Подґайци и Раєво Село, КУД Яким Ґовля Миклошевци, КУД Осиф Костелник Вуковар и КД Руснацох Цвелфериї Раєво Село. На репертоару учашнїкох були преважно коляди маюци у оглядзе же децембер мешац виполнєни зоз крачунску атмосферу.
Орґанизатор манифестациї КУД Руснацох Осєк, a зоз финансийну потримовку Совиту за национални меншини РГ и лоґистичну потримовку Союзу Русинох РГ. Програму водзела Дубравка Рашлянин, а конферансу написала Агнетка Балатинац. После програми друженє предлужене на заєднїцкей вечери.
