Закончени парламентарни виберанки, резултати ясни, победзела Студентска лїстина, прешвечлїво освоєла 52,82 одсто, а СНС котра творела потерашню власц остатнї 14 роки, освоєла 39,12 одсто.
По першираз од уводзеня вецейстранковей системи 1990. року, у Народней скупштини Републики Сербиї нє буду шедзиц посланїки Социялистичней партиї Сербиї (СПС), котри на тих виберанкох нє освоєли достаточно гласи же би прешли цензус. Значи, после 36 рокох, СПС нє будзе часц Парламенту, бо на виберанкох освоєли лєм коло 2,2 одсто. До Парламенту войду ище три меншински лїстини, Союз войводянских Мадярох, Албанска коалиция, Расим Ляїч–Людски, и СДА Санджаку.
Вельке интересованє за парламентарни виберанки було и у дияспори, виходносц була вецей як 80 одсто, а людзе сцерпезлїво чекали у шорох, и по седем-осем годзини же би окончели свою гражданску длужносц.
На виберанкох участвовали 18 лїстини, з котрих аж дзевец у статусу меншинских, а дзепоєдни з нїх оправдано виволую подозривосц до своєй роботи, конкретно, аж шейсц лїстини освоєли менше число гласох, як цо придали подписи потримовки за свойо преглашенє, 10.000, односно 5.000 за меншински лїстини.
Дзень виберанкох прешол нєобчековано мирно, голєм кед ше поровна напр. зоз марцовскима локалнима виберанками у општини Кула, кед на улїчкох було вельо нєпознатих людзох и кед на даскельо заводи реаґовала и полиция, а тераз було якош без векших инцидентох.
После виберанкох и преглашених прелиминарних резултатох, ше славело, и ище ше слави по улїчкох, и на городских площох. Медзитим, ясне же таки резултат нє бул обчековани медийней сцени у Сербиї, цо могло заключиц зоз телевизийних програмох, дзепоєдни програми престали информовац такой потим як СНС припознал пораженє, а телевизиї котру СНС преволовала же є нє обєктивна, на половки вистох нєобчековано претаргнута програма.
Дзепоєдни медиї очиглядно були пристрасни док информовали явносц, менєй або вецей, балансовало ше под прицисками, хто кельо могол, як могол, и кельо сцел. Медзитим, єст и таки чию роботну професийносц треба фахово и пред законом превипитац, а перши професийни пременки ше уж случую у Явним медийним сервису Радио-телевизиї Войводини.
Но, то нє конєц приповедки о виберанкох, уж 8. новембра буду отримани виберанки за Национални совит рускей националней меншини, т.є. за шицки национални совити. А потим, по конєц рока треба обчековац и предсидательски виберанки Републики Сербиї.
