ШИД – У орґанизациї Здруженя гражданох „Сримска забивачка и колбасияда” всоботу, 17. октобра у Словацким парку отримана 29. туристична манифестация „Срим клоб коб фест” на хторей були викладаче и нашивителє нє лєм зоз Сербиї алє и реґиону.
Манифестацию отворел покраїнски секретар за привреду и туризем Ненад Иванишевич визначуюци ше АП Войводина потримує таки манифестациї хтори пестую традицию и сучасну продукцию, та доприноша розвою туризма.
Потим шлїдзело змаганє за швидке фаластованє закланей швинї, а змагали ше домашня екипа Шидяньох „Сримска колбасияда”, потим екипи Бравско и Шипово зоз Босни и Герцеґовини и екипа клальнї „Яношевич” зоз Куковцох. После оцени жирия перше место освоєла екипа Бравско зоз Босанского Петровцу, друга була екипа Сримскей забивачки и колбасияди, треца екипа Яношевич, а штварта була екипа зоз Шипова.
На манифестациї тиж було и змаганє у продукциї швижих колбасох и у швидким єдзеню праженєй колбаси.
У парку були числени штанди подуковательох сухих месових продуктох, вина, палєнки, сокох, сирох, колачох и други ремесельнїцки продукти медзи хторима участвовало Польопривредне ґаздовство „Гнатко” з Бикичу, продукователє вина Соколово зоз Бикичу, вина и палєнки Емилиян Майхер зоз Соту и кушнїр Мирослав Сорочко зоз Беркасова.
Тиж була и забавна програма, а вечар пред тим у Словацким доме отримане фахове преподаванє о продукциї сухей ферментованей колбаси.
