РУСКИ КЕРЕСТУР – Роботне цело (РЦ) за младих прейґ зум платформи отримало схадзку штварток, 13. авґуста, на котрей розподзелєли 350.000 динари по їх Конкурсу за софинансованє младежских проєктох.
Схадзку водзел предсидатель РЦ за младих Дарко Заґорац, а присутни були його заменїк Петро Хромиш, як и члени: Срдян Ґовля, Адрияна Фейди, Алексей Кухар, и Александар Ґнип, а одсутни були ище штверо члени.
На Конкурс котри тирвал од 1. юния по 15. юлий, сцигли осем прияви за младежски проєкти, и кажда приява оценєта як добра, та шицки достаню средства.
Найвецей, 65 тисячи динари опредзелєне за проєкт „Стретнуце младих у Новим Орахове” Форуму младих Рускей матки, а за котри предсидатель РЦ Дарко Заґорац визначел же є и сам автор того проєкту. По 50 тисячи динари опредзелєне за два проєкти: Мултимедиялну манифестацию младих „Дньовка 2026” Здруженю Пакт Рутенорум, и за „Алога Дюрдьов” котре орґанизую млади зоз КУД „Тарас Шевченко”.
Два проєкти достаню по 40 тисячи динари: Часопис МАК за „МАК на живо: руска литература за нову ґенерацию”, КПД ДОК НС за проєкт „Коцурска чуточка”, и здруженє Музика Рутеника за „Музични проєкт ARMY TONES”, док 35 тисячи достане проєкт здруженя СОФИА „Яша Баков у очох младих”, а 30 тисячи динари млади зоз КУД Жатва за проєкт „Жатва за младих”.
Проєкти Стретнуце младих у Новим Орахове и Алога Дюрдьов, директно представели члени РЦ, котри источашнє и одвичательни особи тих проєктох Дарко Заґорац, односно Алексей Кухар, док други апликанти нє мали нагоду представиц свойо проєкти.