ДЮРДЬОВ – Млади орґанизаторе зоз Култутно-уметнїцкого дружтва „Тарас Шевченко” всоботу, 26. септембра, орґанизовали треце Стретнуце младих „Алога Дюрдьов”. Як и вше по тераз, циль стретнуца було друженє младих и їх упознаванє зоз културу и традицию Руснацох у Дюрдьове.
После сходу, котри бул медзи 10 и 11 годзин у просторийох КУД „Тарас Шевченко”, отримана перша роботня, прикрашованє фартухох котри за тоту нагоду ушила млада членїца домашнього Дружтва Кристина Тодорович, котра участвовала и у орґанизациї стретнуца. Потим, на 13 годзин бул полудзенок, после чого, у Рускей одлоги, котра ше находзи у Рускей школи, Мирон Сабадош, котри бул член Управного одбору Култутно-уметнїцкого дружтва „Тарас Шевченко” у периодзе од 1998. по 2018. рок бешедовал о активносцох у Дружтве, о историї Руснацох у Дюрдьове и дюрдьовского Дружтва, як и о историї валалу, дакедишнїх општинских будинкох и будинкох у центре валала, як и орґанизациї роботи и рижних ремеселнїцких роботньох у валалє. Розгварка була интересантна, а млади були тоти котри були любопитлїви и збогацовали розгварку зоз своїма питанями.
После того, од 15 годзин, була роботня на котрей млади пририхтовали вецей руски єдла у кухнї. Направели, а потим и випекли и пражели капушнїки, белюши, ґоргелї и геровци. На концу дня було друженє з музику и деґустацию єдлох котри сами зготовели по рецептох зоз „Рускей кухарки”.
На тогорочним Стретнуцу младих „Алога Дюрдьов” у Дюрдьове участвовали штернацецеро млади зоз Коцура, Чуроґу, Миклошевцох зоз Републики Горватскей и зоз Дюрдьова. Стретнуце финансийно потримало Роботне цело за младих Националного совиту Рускей националней меншини. Орґанизовали го млади зоз Култутно-уметнїцкого дружтва „Тарас Шевченко” з потримовку Управного одбору.
