РУСКИ КЕРЕСТУР – Вчера, 26. октобра була отримана Явна розправа о Националней стратеґиї Рускиньох и Руснацох 2026–2031. року котру би требал принєсц Национални совит рускей националней меншини (НСРНМ).
Спред предкладателя присутни бул лєм др Михайло Фейса, професор ФФУНС у пензиї, котри представел дзепоєдни напрямки зоз Стратеґиї.
Присутни гражданє, представнїки рускей явносци перше поставяли питаня, а потим и оштро критиковали Стратеґию, понеже заключене же Нарис тей Стратеґиї написал сам др Фейса, без консултованя фахових особох, установох, институцийох, и здруженьох о чиєй ше судьби пише у тим документу.
На Явней розправи констатоване же о виробку Стратеґиї нє консултовани анї одбори НСРНМ, цо потвердзене зоз мейлом єдного члена Одбору за информованє.
Єдна зоз озбильнєйших суґестийох же зоз приношеньом Стратеґиї треба почекац же би о тим одлучовало нове зволанє Националного совиту, понеже 8. новембра буду отримани виберанки.
На концу, у пленумскей атмосфери, присутни числени гражданє Руского Керестура єдногласно вигласали же су за тото же би таки Нарис Стратеґиї бул цалком одруцени, и же би ше виробело нови документ по конституованю идуцого зволаня НСРНМ.
Явна розправа прешла у динамичней атмосфери, медзитим предкладатель нє випочитовал начала ровноправней розправи, нєпреривно претарговал собешеднїкох, и зоперал их же би винєсли свойо думаня и становиска.
Гражданє на концу випровадзели др Михайла Фейсу зоз гвизданьом, писканьом и кричаньом.
