ДЮРДЬОВ – Млади зоз Култутно-уметнїцкого дружтва „Тарас Шевченко” зоз Дюрдьова, нєшка, соботу 26. септембра орґанизую Стретнуце младих „Алога Дюрдьов”.
Сход младих будзе у периодзе медзи 10 и 11 годзин у просторийох КУД „Тарас Шевченко” у Дюрдьова, улїца Краля Петра Першого 64.
Од 11 по 13 годзин будзе роботня на котрей учашнїки буду прикрашовац фартухи котри за тоту нагоду ушила млада членїца домашнього Дружтва Кристина Тодорович. Од 13 по 14 годзин заплановани полудзенок. Потим, од 14 по 15 годзин у Рускей одлоги, у Рускей школи у улїци Краля Петра Першого 72 будзе розгварка зоз Мироном Сабадошом, длугорочним членом Управного одбору домашнього Дружтва котри єден з водзацих у унапредзованю роботи у Дружтве од 2000. року. Вон будзе бешедовац о активносцох у Дружтве дакеди и тераз, о историї и активносцох Руснацох у Дюрдьове.
Од 15 по 18 годзин будзе роботня пририхтованя руских єдлох у кухнї у домашнїм Дружтве. Присутни буду правиц капушнїки, белюши, ґоргелї и геровци. На концу дня, скорей друженя, у Дружтву будзе и деґустиранє єдлох котри зготовели, а планує ше и роботня ученя вишиваня.
На Стретнуце младих приявели ше седемеро млади зоз вецей наших местох, та и споза гранїци, як и зоз Дюрдьова. Проєкт Стретнуце младих „Алога Дюрдьов” финансийно потримало Роботне цело за младих Националного совиту Рускей националней меншини. Орґанизаторе Млади зоз Култутно-уметнїцкого дружтва „Тарас Шевченко” зоз Дюрдьова з потримовку Управного одбору того Дружтва.