БАЧИНЦИ – У сали Дома култури пияток, 16. октобра отримана друга културна програма Вочи святому Лукови хтору орґанизовало КПД Драґутин Драґен Колєсар.
Нащивительох привитал парох о. Юлиян Рац хтори здогаднул на прешлорочну програму и єй значенє и же пестованє културного скарбу предлужене, а потим бешедовал и о значносци святого Луки у християнским живоце.
У програми ше зоз шпиванками представела Шпивацка ґрупа КПД Дюра Киш и КПД Драґутин Драґен Колєсар зоз венчиком руских и сербских народних шпиванкох.
Драмски уметнїк Владимир Балащак зоз Сримскей Митровици гуторел виривок зоз поеми Срим Мирослава Мики Антича, а тиж ище на два заводи наступел зоз виривками зоз його драмского фалату Срим наша хижа.
Школяре хтори уча руски язик як виборни предмет рецитовали по руски и читали о святому Лукови, тиж и водзели през програму, а порихтала их наставнїца Наташа Еделински Миколка.
За фолклорни точки були задлужени танєчнїки КУД Младосц зоз Сримскей Рачи зоз танцами зоз Мачви и Лесковцу, а домашнї танєчнїки КУД Младосц зоз Бачинцох одтанцовали танци зоз Сербиї.
На концу програми предсидателька КПД Драґутин Драґен Колєсар Славица Видович додзелєла подзекованя и друженє предлужене на вечери у малей сали зоз музику, танцами и шпиванками.
