РУСКИ КЕРЕСТУР – Схадзка Управного одбору Рускей матки и єй одбору за културу требала буц отримана пондзелок, 26. октобра у просторийох Рускей матки. Медзитим, ище скорей як почала, опрез просторийох ше позберало вельке число младих хтори зоз писканьом и кричаньом дочекали предсидателя Рускей матки, професора ФФУНС у пензиї др Михайла Фейсу.
Праве прето, даєдни члени Матки хтори пришли на схадзку, кед видзели яка ситуация, нє жадали участвовац, а до просторийох вошол предсидатель др Фейса и скоро шицки млади, та прето фактично нє мож повесц же схадзка отримана.
Млади Фейсови найвецей зауважовали, як визначели, його повязаносц зоз Сербску напредну странку и обвиньовали го за зберанє такволаних сиґурних гласох на Локалних виберанкох у Кули, хтори отримани у марцу того року.
Фейса одвитовал же Руска матка нєполитичне здруженє и же кажди єй член ма право на власне опредзелєнє, а тиж присутним подзелєл и рекламни материял лїстини Рускей матки под назву „Щиро за Рускинї и Руснацох – проф. др Михайло Фейса”, хтора ше находзи под числом 2, за наиходзаци виберанки за Национални совит.
Тото стретнуце нє тирвало длуго, а млади на концу предсидателя Рускей матки, професора ФФУНС у пензиї др Михайла Фейсу и випровадзели зоз писканьом и кричаньом.
Гоч за тоту схадзку наявени и други теми як цо то реализованє видавательного плану и отримованє наиходзацих промоцийох, представянє бешеди штучней интелиґенциї по руски, конкурованє на конкурс Одбора за информованє НСРНМ зоз медиями РМ – Радио Руски Керестур и Руски интернет портал, орґанизованє Медзинародного фестивала гумору и сатири Коцурска чутка 2026 и порушованє новей културней манифестациї Днї рускей творчосци у Новим Садзе – о тим на тот завод нє було слова.
