ВЕРБАС – Позарядово парламентарни виберанки внєдзелю, 25. октобра отримани на териториї цалей вербаскей општини, гласало ше у шицких населєних местох.
До виберацкого списку у општини Вербас уписани 30 тисячи и 33 гласаче котри на виберанкох гласали на 36 виберацких местох, од котрих ше 19 находза у городу Вербас. Шицки виберацки места у општини отворени поряднє на 7 годзин.
По нєурядових резултатох, од вкупного числа уписаних гласачох, на парламентарних виберанкох чласали 25 тисячи и 409 гласаче, односно 76,92 одсто, а од вкупного числа гласацких лїсткох, 1,33 одсто були нєважаци.
На уровню цалей општини лїстина число 3 „Студентска лїстина – Студенти победзую” достала найвецей гласи – 13 тисячи и 584, односно 53,47 одсто. На другим месце лїстина число 1 „Александар Вучич – Зєдинєна Сербия” котра достала 10 тисячи и 244 гласи, односно 40,32 одсто, а на трецим месце лїстина число 2 „Ивица Дачич – Фактор стабилносци – Социялистична партия Сербиї – Єдинствена Сербия – Социялдемократска партия Сербиї и Желєни Сербиї” зоз 727 гласами, односно 2,86 одсто.
По завераню виберацких местох у шицких валалох вербаскей општини, як и у самим городзе, вельке число людзох з городу и околїска ше позберало у центру Вербасу чекаюци резултати. По обявйованю побиди „Студентскей лїстини”, центер городу бул виполнєни зоз преславу, ошмихами, музику, танцом, а после пол ноци пущени и огньомет.
Преславйованє побиди симпатизерох „Студентскей лїстини” прешло без инцидентох.
