РУСКИ КЕРЕСТУР – У центру валала, внєдзелю 6. септембра, отримани штварти Гуманитарни базар.
Керестурци уж од 8 годзин рано могли нащивиц базар и зоз купованьом рижних сланих и сладких лакоткох, облєчива, прикраскох и стварох за обисце и подобне, помогнуц троїм дзецом зоз општини Кула за хтори ше зберала помоц.
Як поручели орґанизаторе, тото случованє з рока на рок вше нащивенше, а у нїм участвує и вше векше число донаторох, хтори ше сами явяю и дарую лакотки, кнїжки, облєчиво и други ствари хтори им вецей нє потребни а нови су або нє хасновани. Тоти ствари ше потим предава на базару за символичну суму, а назберани пенєж того року наменєни за помоц дзецом зоз Кули и Червинки – Лукови Лацко, Уни Вуканац и Теодори Неурочни.
З оглядом же слани и сладки єдла уж такой рано розпредати, пополадню було орґанизоване праженє палачинкох, потим рисованє по твари, за цо була задлужена Клара Катрина, и плєценє варґочикох за цо ше остарала Марина Рац.
Орґанизаторе визначели же су барз задовольни зоз одволаньом и нащивительох и донаторох. У орґанизованю Гуманитарного базару помогли Здруженє гражданох „Руска скарбнїца”, хторе пожичело тенди и столи, керестурски Каритас и його волонтере, як и кафе-бар „Мала оаза”, хтора обезпечела струю.
