НОВЕ ОРАХОВО – Внєдзелю, 25. октобра на швето Христа Царя, зоз Службу Божу на 14 годзин, хтору служел декан бачки и коцурски парох о. Владислав Рац у Новим Орахове преславени 41. Кирбай.
Грекокатолїки у Новим Орахове вше Кирбай славели на швето св. Архангела Михаїла, а кед 1985. року направена римокатолїцка церква, дзе нашо вирни достали каплїчку, порадзели ше з Мадярами римокатолїками же би Кирбай славели єден дзень, кажде зоз свою литурґию остатню нєдзелю у октобру на швето Христа Цара. Парох коцурски о. Владислав Рац, од 1986. року служи Служби Божо у тим нашим наймладшим валалє.
У казанї о. Владислав Рац визначел значносц швета Христа Цара у наших животох. Службу Божу шпивала Татяна Мученски зоз Коцура.
Порядна Служба Божа будзе на нєдзелю, 8. новембра на 14 годзин.
