РУСКИ КЕРЕСТУР – На 14. Привредно-туристично-културней манифестациї „Днї керестурскей паприґи” после даскелїх рокох прерви, бул орґанизовани виход на польо паприґи, дзе було презентоване пирсканє паприґи зоз дроном.
Пирсканє зоз дроном окончело подприємство „Agro aero” зоз Зомбора котре уж ма искуства на тих теренох и котре потераз окончовало пирсканє на даскелїх парцелох.
Як визначел Максим Щипак спред „Agro aero”, пирсканє зоз дроном ма вецейнїсти предносци, насампредз же особа котра пирска нє уходзи до поля, же ше нє ґажи зоз трактором и пирскачку польо, и же му прецизносц наисце велька, а же шицко мож окончиц зоз гет меншим количеством води и барз швидко.
Паприґаре як зоз валалу, так и госци зоз околних местох ше зацикавели за таки способ хаснованя хемийних защитних средствох, и после оконченого пирсканя дискутовали и випитовали ше о предносцох котри приноши пирсканє зоз дроном.
Пирсканє зоз дроном було на ярашу на паприґи Бориса Медєша котри того року ма посадзене гектар и пол паприґи на двох парцелох, на єдней червену рогову, а на другей бабуру и парадичову паприґу.
Як визначел Медєши, паприґа би могла буц лєпша, медзитим и по його и по словох фаховцох, тот продукцийни рок нє бул идеални, и нє було лєгко випестовац паприґу. Попри тим, вон уж на даскельо заводи пирскал паприґу зоз дроном, и видзи предносци.
