НОВИ САД – У Покраїнским секретарияту за културу и явне информованє вовторок, 3. новембра отримана роботна схадзка на хторей ше представителє рускей националней заєднїци з фаховима особами зоз Секретарияту консултовали о даскельо питаньох значних за Руснацох у Войводини.
Насампредз бешедоване о модалитетох за формованє музейней збирки Руснацох, о РНТ „Петро Ризнич Дядя” и о ситуациї коло змесценя Заводу за културу войводянских Руснацох.
Спред рускей заєднїци на схадзки частвовали предсидатель Националного совиту Руснацох Славко Рац, директор Заводу за културу войводянских Руснацох Серґей Тамаш и кустоска у Музею Войводини Любица Отич, а спред Секретарияту помоцнїк покраїнского секретара задлужени за културни скарб и явни збирки Милан Мицич и помоцнїк секретара за културу меншинских заєднїцох и аматеризем Атила Югас.
Вязано за музейну збирку, представителє Секретарияту суґеровали же би руски институциї основали фондацию хтора будзе снователь музейней збирки, понеже то способ за познєйше участвованє на конкурсох хтори буджетским институцийом нєдоступни.
Од Покраїнского секретарияту глєдана потримовка же би ше од кулскей локалней самоуправи вимагало участвованє у финансованю професийного роботного места у нашим националним театру, а актуална тема постава и предаванє будинку „Дневнику” у Новим Садзе, та з тим и змесценє Заводу за културу Руснацох. Познате же НВУ „Руске слово” у будинку „Дневнику”, а Завод у просторийох „Руского” у Футожскей улїци.
Понеже схадзка у Покраїнским секретарияту була консултативна, у наступним чаше, вєдно з покраїнскима институциями, представени идеї буду формализовани.