Вельо активносци у року за нами

автор Йоаким Рац
542 Опатрене

У року за нами сам початок активносцох и роботи нового зволаня бул преткани з активносцами коло пременки статуту Националного совиту и формованю одборох и роботних целох. Як сом наглашел у плану роботи и активносцох за 2023. рок, пробовал сом помириц становиска членох пейцох лїстинох, обєдинїц членох Совиту, одборох, роботних целох, чолних людзох у наших институцийох и других чесних Руснацох котрим руски интерес заєднїцки, же би на перше место положели национални идентитет и национални интерес Руснацох.

Думаня сом же ше ми то поспишело, а на тото указує и факт же Национални совит отримал 17 схадзки у полним зволаню – пейц порядни, єдну прейґ зум платформи и 11 електронски. Треба надпомнуц же ше схадзки отримовало без проблема зоз кворумом, цо указує и на пошвеценосц и одвичательносц самих членох Нациналного совиту. Було и вецей як 90 активносци и стретнуца звонка шедзиска Националного совиту, а то насампредз стретнуца зоз чолнима людзми општинох дзе жию припаднїки нашей националней заєднїци, представнїками державних орґанох, руских институцийох, здруженьох…

Активованa робота Координациї националних совитох и Совиту за национални меншини Влади Републики Сербиї, чия перша схадзка була наисце конструктивна. Представнїки министерствох слухали представнїкох националних совитох, цо резултовало зоз звекшаньом средствох националним совитом, першим после вецей як 10 рокох и у велькей мири релаксовало роботу самого Националного совита у финансийним смислу.

Тиж так поспишело нам ше, зоз вецеймешачнима активносцами, предлужиц уписованє до першей класи у Коцуре и ознова уписац дзеци до першей класи у Дюрдьове. У медзичаше шветочно отворени просториї Заводу за културу войводянских Руснацох у улїци Матици сербскей, дзе ше и найвецей швечи буц нашому Заводу.

Лєтни мешаци були пошвецени виробку Правилнїка о подручних канцеларийох Националного совиту. Зоз нїм ше по перши раз пробує праведнєйше вредновац роботу и активносци подручних канцеларийох, односно наших културно-уметнїцких дружтвох, насампредз у финансийним смислу.

Найзначнєйша подїя котра, окрем членох Совиту и Одбору за образованє, активовала и вельке число наших просвитних роботнїкох, то преслава 270-рочнїци образованя по руски, 120-рочнїци предшколского образованя у Руским Керестуре и 100. рочнїци обявйованя першей рускей Ґраматики. Зоз тоту преславу указали зме же маме ище творчи моци предлужиц руске образованє, як у порядней так и у виборней настави.

Тема котра мнє, а и членох Националного совиту, длугши час порушує на роздумованє то положенє рускей националней заєднїци и функционованє нашого Совиту у шветлу резултатох попису жительтва. Сам попис указал же за розлику од 2011. року кед нас було 14 246, тераз єст 11 483 Руснацох, односно менєй за 2 763. Ище єден податок котри илуструє алармантни стан то же нас наприклад у Руским Керестуре єст 2 963, односно за 810 Руснацох менєй як у 2011. року.

Таки тренд и у других руских штредкох, у велькей мири, окрем биолоґийного обстояня Руснацох, загрожи и права и шлєбоди и у правним и у финансийним смислу. То тема котра муши буц приоритет нє лєм Националного совиту, алє и цалей рускей заєднїци. Лєм заєднїцки, кед же уж нє можеме тот стан пременїц, можеме голєм застановиц, алє надпоминам – лєм зоз мобилизованьом шицких творчих и интелектуалних руских моцох.

Рок за нами указує вельо активносци котри порушани и я щиро дзекуєм шицким хтори на даяки способ участвовали у нїх. Правда и тото же ище вельо того пред нами. Образованє и надалєй останє приоритет у роботи Националного совиту, тиж так и активносци на виробку новей Националней стратеґиї. Знам же актуалне зволанє Националного совиту ма моци зочовац ше зоз виволанями котри пред нами и верим же їх закладанє поруша и шицких тих котрим руски национални идентитет и интерес у першим плану.

ПОВЯЗАНИ ТЕКСТИ