Першенствени стретнуца кулского срезу 1946. року почали штредком юния. Русин мал пременлїви резултати, алє и успихи. На Ярашу вибудовани трибини, а теди клуби хтори бавели у тей ґрупи/лиґи були подзелєни до двох ґрупох.
У першей ґрупи були: Русин, Кула, Вербас и Червинка, а у другей були други постави – Русин 2, Кула 2, Вербас 2 и Червинка 2, як и екипи з Бачкого Доброго Поля, Коцура, Липару (Соколцу), Крущичу (Вепровачу), Савиного Села (Торжи).
ПРЕТАРГНУТЕ СТРЕТНУЦЕ И БУДОВАНЄ ТРИБИНОХ
Два побиди на початку першенства Русиновим фодбалером дали кридла. Перша побида була процив Червинки 1 (2:1), а ище векши мотив за лєпше бависко була побида процив Пролетера з Вербасу (3:2).
З тоту побиду Русин мал вельки вигляди у шлїдуюцей сезони бавиц у висшим ранґу – Окружним фодбалским першенстве.
Спомедзи русиновцох зоз своїм добрим бависком одскаковали млади бавяче Владо Папуґа и Михал Стрибер.
Медзитим, стретнуце хторе бавене у Руским Керестуре процив екипи Єдинства з Кули, Русин страцел зоз 3:0 после лєм 35 минутох, кед стретнуце и претаргнуте. У новинских звитох писало же за шицки три ґоли бул виновати судия. „После трецого ґолу – настава на площи ФД „Русин” тото цо ше нє трафело од кеди Русин постої, а тому єст 25 роки. Публика убегує на площу и лєм тельо же нє було шицкого. У тей гужви судия претаргнул стретнуце” – писало у наших новинох.
Тото стретнуце було важне, бо одлучовало чи Русин будзе перши, чи остатнї на таблїчки.
Штредком авґуста 1946. року Управни одбор СД „Русин” принєсол одлуку же би ше на фодбалским стадиону на Ярашу вибудовали закрити трибини за патрачох длугока 32 метери. Месни Народни одбор обезпечел жем за терен, а цегла и череп купени по тунєй цени.
Спортски трибини на Ярашу ше закончовало концом новембра 1946. року, лєм мешац од початку будованя. Нєодлуга почало и першенство.
На тот завод у лиґи були екипи з Вербасу, Кули, Червинки, Сивцу, Зомбора, Моноштору, Апатину, Бездану, Сонти, Стапару, Бачу, Парабутю (Раткова), Оджаку и Керестура.
Процив Текстилца з Оджаку Русин страцел з резултатом 1:0. Тота сезона була ище вше под упечатком вельких побидох над моцнєйшима екипами. Так було по конєц тей сезони.
У першенственим стретнуцу у Соколцу 6. априла 1947. року Русин одбавел нєришено з домашню екипу, 4:4.
Керестурски фодбалере до Липару пошли на кочох хтори цагали конї. Русиновци нє були у комплетним составе, бавели нєповязано и лєгко доставали ґоли. Но, заш лєм, найлєпши на терену бул Иларийон Намачински. Резултати зоз наиходзацих стретнуцох були таки: Русин–Вепровач 4:0, Сивец–Русин 2:2, Нова Червинка – Русин 0:2, Русин–Червинка 1:4. Соколац–Русин 5:2.
На концу першенства нашо новини писали о кризи у керестурским фодбалу. Русин нє мал подросток, а старши бавяче, єден по єден, преставали бавиц. За тоту кризу найвецей критиковани предсидатель и члени Управи Русина.
У новей сезони, 12. септембра, Русин на Ярашу страцел од екипи з Туриї зоз 5:0. Тото стретнуце указало же ше Русин ище вше находзел у велькей кризи. Бавяче нє тренирали, алє заш лєм мали моци и шмелосци подценьовац процивнїцки екипи.
Концом септембра, точнєйше 28. септембра 1947. року, у Доме култури отримана Рочна схадзка ФД „Русин”. Звит о роботи дал предсидатель Яша Баков. У тим звиту винєшени успихи, алє и нєуспихи Дружтва. Вибрани нови Управни одбор, за предсидателя вибрани Йовґен Папдюрдес, а Симун Чапко (пекар) и Йовґен Колбас за подпредсидательох.
У наиходзацих стретнуцох Русин победзел Червинку зоз 5:0 и Сивец зоз 3:1.
У 1948. року Русин на Ярашу победзел екипу з Оджаку 3:1, алє уж шлїдуюце стретнуце страцел од Гайдука з Кули 5:1. Русин страцел у тим периодзе и єдно приятельске стретнуце од сушедох зоз Крущичу з резултатом 4:3.
У 1949. року Русин победзел Пролетер з Вербасу 4:0, а потим и Єдинство з Кули 2:1.
Теди Фодбалске першенство кулского срезу одбавене у двох ґрупох. У єдней ґрупи побиднїк бул Пролетер з Вербасу, а у другей побиднїк бул Русин. Побиднїки ґрупох у двох змаганьох требали одлучиц же хтора фодбалска екипа освої перше место у кулским срезу.
Перше змаганє одбавене у Керестуре, а победзел Русин з резултатом 1:0. У реваншу на вербаским терену резултат бул нєришени 2:2. Русин бавел у составе: Я. Рац – Сеґеди, Виславски – В. Папуґа, Ю. Рац (Мишков) Ґриз, Планчак, Чижмар, Надь, Стрибер, Горняк, Медєши, Я. Рац.
Керестурски фодбалере зазначели вельки успих – Русин ше конєчно пласовал до Ґрупного першенства.
ПЕРША СЕЗОНА У ҐРУПНИМ ПЕРШЕНСТВЕ
Першенствена ґрупа Фодбалского центру Зомбор була составена зоз найлєпше пласованих екипох трох срезох: кулского, зомборского и оджацкогo.
У Ґрупним першенстве Фодбалского центру Зомбор у 1950. року змагали ше 11 екипи: Желєзнїчар (Зомбор), Текстилєц (Оджак), Русин (Руски Керестур), Пролетер (Вербас), Сидро (Апатин), Славия (Вербас), Єдинство (Колут), Спартакус (Червинка), Тврдява (Бач) Славия (Пиньвиц) и Младосц (Стапар).
На концу Ґрупного першенства 6. авґуста 1950. року ФК „Русин” на першенственей таблїчки Фодбалского центру Зомбор завжал високе треце место.
(Предлужи ше)
