Кажде з нас народзени зоз даякима талантами, алє Заря Ковачова зоз Руского Керестура их ма даскельо и, кед би єй дахто тераз наказал же би ше опредзелєла лєм за єден, було би єй барз чежко вибрац
Розгварку зоз Зарю зме мушели почац лєм на єден способ – най нам погутори цо ю шицко интересує, бо бизме анї сами нє могли попаметац.
Вона почала зоз балетом, и то модерним, котри учи од свойого пиятого року у Вербаше.
– Два раз тижньово учиме нови крочаї и вежбаме хореоґрафию, а раз на балету маме ґимнастику. Уж зме вецей раз наступали и достали зме вельо медалї. Нєодлуга будземе наступац, та тераз досц вежбаме. У ґрупи нас єст петнацецеро и вше ше пририхтуєме напредок – шивачка нас вимера и вец нам шиє сукнї. Балетанки котри ношиме направени за модерни балет и вообще нє чежко у нїх танцовац – гвари Заря.
Окрем того, вона ходзи и на фолклор до керестурского Дома култури, цо тиж барз люби, бо ужива у танцу.
СПОРТСКИ ДУХ
Карате почала цалком случайно тренирац. Кед єй мама одведла младшого брата Феликса на перши тренинґ, Заря го остала чувац. Но, участвовала и вона на тренинґу, та од теди по тераз сцигла по желєни пас. Тераз тренира у Карате клубу „Гайдук” у Кули.
– Полюбела сом карате и нє чежко го тренирац. Першираз сом ше змагала у децембру, и то у Словацкей. Барз нам було фино, бо зме нащивели и рижни места, купали зме ше у базену и дружели – преноши нам свойо упечатки.
Заря зна же добри каратиста муши буц оштри и барз добре звладац рижни технїки котри ше учи на тренинґох. Прето треба поряднє тренирац, та вец нїч нє чежко.
Вона люби и плївац, та вєдно зоз братом ходза на тренинґи викендами, и гвари же и у плїваню треба досц того звладац.
– И у плїваню постоя рижни технїки, та учиме плївац на хрибце, делфин, скакаме зоз дескох и плїваме краул… Вше фино обдумаю тренинґи, та нам барз интересантне – гвари Ковачова.
УМЕТНЇЦКА НЇТКА
Зарйова мама и тато гваря же одмалючка указовала прихильносц ґу ґлуми и красному вислову. Анї нє чудне, кед ю мама водзела на кажду дзецинску представу цо є виведзена на Драмским мемориялу Петра Ризнича Дядї. Свою любов ґу ґлуми указала и кед вєшенї почали театрални роботнї „Цо пожадам тото можем буц”.
– Кед сом була мала вше сом задумовала же ґлумим. Перше сом дакус вежбала, а вец сом поволала маму и тату и направела сом им представу. Барз сом то любела робиц. Тераз пришол час за тото, та сом ше уписала на ґлумецки роботнї.
Заря нам виприповедала же вєдно учели як ясно вигваряц слова, вежбали як ше треба ужиц до улоги и велї други ствари.
– На паперикох зме достали написане цо маме одґлумиц. Я достала задаток же бим одґлумела же ми випаднул зуб и то жалосно, щешлїво, нагнївано, злєкнуто и престрашено. На роботньох зме учели и цо нє треба робиц у театру, же бизме научели и других цо то театрални бон-тон – гвари Заря.
Же ма притоку и ґу крашнє виповедзеному слову знаме прето же ше уж два раз змагала у рецитованю, и то дзекуюци учительки котра ше школяром питала хто жада участвовац.
– Такой сом ше приявела, бо любим буц на бини. Нє хиба чи шпивам на „Пупчу”, чи ґлумим, чи рецитуєм, чи покладам у каратеу. Єдноставно – нє мам трему.
Уметнїца би нє була уметнїца кед би нє любела и музику. Заря ходзи и до музичней школи.
Кед була мала, припатрала ше на тету як грає на клавиру. Стала з боку и помали ше учела. Кед пришол час, у другей класи, уписала ше до Школи за основне музичне образованє.
– Ходзим и на солфедьо дзе ше пририхтуєме за швета. Учиме коляди, уж зме обдумали писню за Осми марец, та участвуєме у програмох и заєднїцки наступаме на концертох.
Попри тих секцийох, ходзим и на анґлийски и нємецки, та мам обовязку за обовязку.
ПОТРИМОВКА
Заря можебуц нє зна, алє сиґурно чувствує же рижни активносци, чи спортски чи уметнїцки, позитивно уплївую на психо-физичне и менталне здравє дзецка. И вшелїяк же єй барз помага потримовка родичох.
– Даєдни днї ми барз завжати, та кед ме мама вожи, до авта берем потребни ствари и вец шицко можем сцигнуц. Углавним мам тренинґи два раз до тижня або през викенд, та мнє то нє проблем.
Заря успишна и у школи, школярка є трецей класи, а найволї подобове. Зна барз крашнє рисовац. Єй роботи часто обявйовани у „Заградки”, вше ма даскельо идеї цо мож нарисовац на даяку тему.
– Ище кед сом була мала любела сом рисовац. У оводи зме вельо рисовали, правели винчованки… Дакеди патрим и на интернету як ше дацо рисує, або у „Заградки”, на телефону и вше мам идеї за даяки слики за приповедки, алє найлєпше ми идзе прерисовйованє, а найволїм вифарбйовац зоз древковима печацами – цеши ше Заря.
Влєце, док тирва розпуст, люби ше бавиц зоз пайташками, та ше вожа на бициґлох, лєбо бавя вонка и теди ше одпочива. Розгварку Заря закончела щиро, и анї нє дума од дачого одустац. Гвари же покля може шицко постарчиц и ужива у тим цо роби, нїч єй нє чежко. – Думам же хто ходзи на спорт будзе розрушани, нє будзе часто хори. Дахто люби буц стално дома. Я нє. Мнє допито кед сом сама дома и кед нє мам роботи. Любим ходзиц вшадзи. Кед путуєме з балетом, лєбо каратеом можеме видзиц нови ствари и упознац ше з другима дзецми – радосно закончує Заря.
