Фодбалски першенства у Югославиї и 1951. року бавели ше у истим календарским року. Першенствена сезона мала почац и завершиц ше у двох часцох, алє у истим календарским 1951. року. Русин нє мал шесца и випаднул з Ґрупного першенства.
Дзешец учашнїкох (медзи хторима бул и ФК „Русин” з Руского Керестура) Ґрупного першенства Фодбалского центру Зомбор за 1951. рок потвердзел у фебруару 1951. року Управни одбор ФО Войводини на своєй схадзки.
Були то исти фодбалски екипи хтори ше змагали и у сезони 1950. року. У новей сезони нє бавели екипи: ФК „Младосц” (Стапар), ФК „Славия” (Пиньвиц) и ФК „Пролетер” (Вербас). Место нїх у тим Ґрупним першенстве були ФК „Раднички” (Вербас) и ФК „Єдинство” (Светозар Милетич).
Ґрупне першенство Зомборского фодбалского центру почало ище вжиме, початком марца, а закончене є концом октобра. У першей и другей часци першенственей сезони 1950. року Русин зазначел два побиди и єдно нєришене стретнуце. Русин на концу бул на предостатнїм месце и випаднул зоз Ґрупного першенства. Теди у екипи бавели: Янко Рац, Йовґен Панкович, Любо Планчак, Яким Варґа, Юлин Рац, Юлин Будински, Янко Пастернак, Мирон Медєши, Янко Сеґеди, Яким Грубеня и Юлин Чизмар.
Лєпши резултати екипа Русина мала у Купу „Маршала Тита” – зазначели пейц побиди, алє у шестим колу страцели од вельо лєпшей екипи ФК „Спорт” з Бездану з резултатом 4:1. Состав Русина бул: Иван Цвип, Любо Планчак, Юлин Будински, Янко Дудаш, Янко Сеґеди, Любо Бесерминї, Йовґен Медєши, Любо Папуґа, Михал Стрибер, Яким Варґа и Яким Чизмар. Замени були: Янко Пастернак, Яким Грубеня и Владо Папуґа.
НАЙЛЄПШИ НА СРЕЗКИМ ПЕРШЕНСТВЕ
Початком 1952. року керестурски фодбал бул и далєй у кризи. Криза настала после нєуспиху Русина на Ґрупним першенстве у 1951 року. Управа и бавяче Русина були нєактивни од початку 1952. року до самого початку ярнєй часци Срезкого фодбалского першенства. После Рочней схадзки СД „Русин”, члени Управи вецей ше нє зишли и нїхто з нїх нє анализовал нєуспихи фодбалерох и нє предложел як висц з такей чежкей ситуациї.
Перше змаганє на Срезким першенстве за 1952. рок одбавене 16. марца, а бавело ше по 11. май. Остатнє стретнуце Русин бавел на Ярашу процив екипи ФК „Опачич” з Липару и победзел з резултатом 2:0. З оглядом на тото же Русин победзел на шицких стретнуцох, указал же му заш лєм место у висшим ранґу змаганя. Як шампион здобул право бавиц квалификацийне стретнуце з побиднїком у другей ґрупи за перше место у Срезким ранґу.
Перше квалификацийне стретнуце за перше место у Срезким ранґу одбавене 15. юния 1952. року. Побиднїки ґрупох ше стретли у Вербаше – Раднички и Русин, резултат бул 8:1 (5:1).
У кавлификацийним стретнуцу за Зонске першенство Русин страцел од Желєзнїчара зоз Зомбора з резултатом 4:1, а у реваншу Русин победзел зоз 1:0. После першого кругу Русин бул на першим месце, но, у предлуженю русиновцом ше нє удало врациц до висшого ранґу змаганя.
Фодбалски союз Югославиї принєсол одлуку же ше шлїдуюци фодбалски першенства буду одвивац у двох календарских рокох. Перша (єшеньска) часц будзе у єдним року, а друга (ярня) часц, кед ше и закончи першенство, у першей половки шлїдуюцого року.
Шлїдуюци фодбалски першенства починали уж концом лєта 1952. року. Русиновцом остало лєм же би ше и далєй, у сезони 1952/53. рок, змагали на Срезким фодбалским першенстве.
ЮВИЛЕЙ – 30 РОКИ ФК „РУСИН”
Преслава 30-рочнїци ФК „Русин” у Руским Керестуре отримана 1, 2. и 3. мая 1953. року. Екипа ФК „Русин” зоз 1953 року хтора бавела на Преслави 30-рочнїци фодбала у Руским Керестуре꞉ Єфрем Колєсар, Любомир Бесерминї Роґич, Йовґен Виславски Дїдо, Йовґен Медєши, Янко Сеґеди Пипо, Дюра Папуґа Бобек, Янко Колбас, Яким Гафич; куча з лїва: Яким Варґа Лемко, Янко Надь, Томислав Рац Стинчич, Любомир Планчак Пуби и Янко Дудаш Шимрак (насловна фотоґрафия).
Перши дзень, гоч хвиля була подла, пред вельким числом патрачох одбавени приятельски фодбалски стретнуца: ФК „Гвизда” (Петровци) – ФК „Задружни селяк” (Нове Орахово) 2:1 и „Гвизда” (Миклошевци) – „Искра” (Коцур) 4:2. Други дзень одбавени тиж два стретнуца: Б репрезентация Срим – Бачка (1:7) и А репрезентация Срим – Бачка 1:3(1:0).
Треци дзень пред поладньом у малей сали Дома Култури отримана шветочна схадзка на хторей були присутни члени тедишней Управи, снователє „Русина”, скорейши и терашнї бавяче, як и велї любителє фодбалу и госци.
Схадзку отворел и водзел Дюра Варґа, руководитель Одбору за преславу. Историят „Русина” винєсол Любо Такач, член Управи клубу, а о роботи Дружтва дискутовали проф. Баков, инж. Малацко и учитель Яким Олеар, а бешедовали и о часох кед вони були руководителє Русина.
Пополадню при фодбалским терену Яша Баков и його школяре Яким Рамач Йока и Михал Рац Пицоль скакали з палїцу до висока. Победзел Баков з висину 3,30 метери. После атлетики одбавене фодбалске змаганє: Репрезентация (бавяче з Петровцох и Миклошевцох) – Русин Р.Керестур 0:5.
У рамикох преслави ювилею ФК „Русин” отримани и турнир у шаху и турнир у столним тенису.
(Конєц)
