Членїца є боксерскей репрезентациї Сербиї за жени у катеґориї до 48 кили и змага ше як омладинка. З початку вибор спорту нє бул по дзеки родичом, алє познєйше вони єй були велька потримовка. Резултат – вельки успихи.
Ивана Чижмар, членїца Боксерского клубу „Чарнок” зоз Вербасу, бокс почала тренирац кед була седма класа. Тераз ма осемнац роки, закончела трецу класу Штреднєй фаховей школи „4. юлий” у Вербаше, напрям – технїчар драгового транспорту. Од 2022. року членїца є юниорскей боксерскей репрезентациї Сербиї за жени у катеґориї до 48 кили и актуална є шампионка Сербиї у боксу за жени до 48 кили.
– Бокс сом почала тренирац после того як представнїки Боксерского клубу „Чарнок” у моєй школи, у Основней школи „Светозар Милетич” у Вербаше, представели школяром бокс як спорт и клуб и поволали нас же бизме пришли до БК „Чарнок” и почали тренирац бокс. Пошла сом до Центру за физичну културу у Вербаше на даскельо тренинґи, мнє ше то попачело, так же и нєшка тренирам. Тренер ми од початку Желько Жмукич, хтори теди бул и предсидатель того боксерского клубу. Тренинґи маме кажди роботни дзень, а през викенд зме шлєбодни – гутори Ивана хтора тераз на заслуженим лєтним одпочивку.
Кажде хто ма нагоду видзиц Ивану, нїжну и крегку дзивку, аж поцерпа же би ю дахто могол вдериц, гоч ше зна же тренира тоту спортску дисциплину.
– Родичи перше були процив же бим тренирала бокс, бо сом дробна, алє кед видзели же мам барз вельку дзеку, потримали ме и потримую ме и тераз. Купую ми опрему, кеди цо треба – патики, шорц, маїци, рукавици, бандажи, штранджґи за скаканє за отримованє глєданей чежини цела (килажи) и за кондицию – гутори Ивана.
НАЙВАЖНЄЙШЕ ЗНАЦ ЗАВЖАЦ АДЕКВАТНЕ ПОЛОЖЕНЄ
Ивана ше почала змагац у другим року тренираня, у осмей класи.
– З перших змаганьох мам моцни упечатки, бо ме на перших двох мечох покрадли, и то ме мотивовало же бим предлужела далєй. Видзела сом же можем добре боксовац и же мам нагоду победзиц. Змагали зме ше у месце дзе и нашо процивнїки и судийове були з истого штредку, а судийове дакус помогли же би победзели боксере з їх териториї. Нє було ми право, алє сом достала вельку дзеку тренирац и напредовац. Вдереня у боксу ме нє боля и нє боїм ше од нїх, а успих завиши од того кельо процивнїк моцни и кельо є схопни и порихтани за змаганє. Даєдни вдереня випатраю же можу виволац вельки боль, алє часто песци процивнїка анї нє дорушую цело другого боксера – гутори Ивана и додава же у боксу найважнєйше знац завжац адекватне положенє.
Боксерски клуб „Чарнок” тренинґи отримує у Центру за физичну културу у Вербаше „Драґо Йовович”.
– На тренинґох маме кардио-вежби, вежби боксованя меха кед увежбуєме технїку, маме боксованє з пару на хторим ше виправя нєдостатки, усовершує технїку вдереня, а стредами маме спаринґ, боксуєме ше з процивнїком и вец ту укажеме шицко цо зме през тидзень научели. Тераз зме „женски” клуб, бо у клубу єст седем дзивки и єден хлапец. Хлапци престали тренирац, углавним бо ше пошли школовац до других местох, а кед сом почала тренирац пред пейцома роками, було нас дас трицецеро. З часу на час до клубу приходза нови члени, а тераз од хлапцох з нами тренира лєм Стефан Цамович з Вербасу, хтори барз успишни аж и на медзинародних змаганьох – гутори Ивана.
УСПИХИ НА МЕДЗИНАРОДНИХ И ДОМАШНЇХ ЗМАГАНЬОХ
Ивана ше змага у катеґориї од 48 до 50 кили, а понеже у тей катеґориї нєт вельо боксерки, часто ше случує же ю преруца до чежшей катеґриї и вец ше змага з дзивчтами хтори маю 52 кили. Вона зазначела вельки успих на Купу нацийох 2020. року дзе освоєла 3. место як боксерка з найменєй килоґрами, змаганє було у Зомборе у Городскей сали „Мостонґа”.
– Мнє барз важне и же сом 30. децембра 2022. року зазначела успих на Першенстве Сербиї у Чачку. Требала сом ше змагац у своєй катеґориї од 46 кили, алє нє було таки боксерки, та ме преруцели до чежшей катеґориї. Мала сом процивнїцу хтора мала 52 кили, победзела сом ю и вошла сом до боксерскей репрезентациї Сербиї за жени. Теди сом була хора и нє знала сом чи сом годна витримац, алє сом победзела – гутори Ивана.
Того року нє була на вельо змаганьох пре финансийну ситуацию свойого клубу и прето же, як гвари, нє була досц порихтана, бо була фокусована на школу. Як членїца юниорскей репрезентациї Сербиї у маю участвовала на Европским першенстве у Румуниї, у Темишвару, победзела у першей рунди, алє єй нє було добре, та придала меч после першей рунди…
БОКС ИНДИВИДУАЛНИ СПОРТ, КАЖДЕ ШЕ З КАЖДИМ ЗМАГА И КАЖДЕ ПАТРИ НА СЕБЕ.
– Бокс ми ше пачи пре друженє, мам нагоду упознац вельо людзох, а и любим ше змагац. Кед войдзем до ринґу, чувствуєм вельки адреналин, любим тото чувство кед победзим. Нїґда ше нє боїм, пред мечом мам позитивну трему и вец кед войдзем до ринґу, барз ше фино чувствуєм. Нє мам даяки окремни режим живота, нє пиєм соки, нє курим, дома єм тото цо уварене… Боксуєм у лєгкей катеґориї и лєгко можем схуднуц даєдну килу кед треба. Ставам вчас рано, бежим дас од 5 годзин и ходзим поряднє на тренинґи. Мала сом дакус бриґи зоз спаньом. Накеди нє тренирам, проблем ми заспац, а кед тренирам, добре и шпим – гутори Ивана.
По законченю штреднєй транспортней школи Ивана ше планує уписац на пияти ступень за инструктора, або на транспортни факултет, а кед слово о боксу, пошвидко ше почнє рихтац за медзинародне змаганє „Войводянска златна рукавица”, хторе будзе отримане у авґусту у Суботици.
– Там идзем першираз и радуєм ше же ше будзем змагац з боксерами з иножемства. Пременєла сом технїку. Скорей сом була аґресивнєйша, вельо сом нападала и трацела моц, боксовала сом з директним вдереньом, а тераз углавним боксуєм з дистанци, пущам процивнїка же би ме нападал и частейше применюєм кроше. Найвекше жаданє ми же бим як сениорка на европским або шветовим змаганю освоєла медалю, бо думам же то будзе важне за мою будучносц и мой живот – заключує Ивана, а ми єй жадаме вельки успих.
ПРЕМЕНЄЛА ТАКТИКУ
Тренер Желько Жмукич за Ивану гври же є барз талантована, алє же муши и поряднє тренирац, а дакеди єй нє лєгко усоглашиц тренинґи и обовязки у школи.
– Тераз пременєла тактику, бави з контри и осторжнєйша є. Рахуєме же будзе мац векши нагоди и успихи док наполнї 19 роки и прейдзе до сениорского статуса – гутори Жмукич.
На омладинским уровню нєт орґанизовани пририхтованя за боксерки, так же ше Ивана за змаганя пририхтує лєм у своїм матичним клубу, док сениорска боксерска репрезентация за жени ма обезпечени порядни пририхтованя за змаганя.
