Маю часу за шицко

автор Я. Дюранїн, Фото Б. Маґоч
1.3k Опатрене

Гоч медзи нїма два роки розлики, браца Андрей и Иван Маґочово зоз Нового Саду маю подобни интересованя. Любя читац кнїжки, музику и спорт, алє и шлєбодни час котри препровадзую у путованю и друженю

Андрей ходзи до першей, а Иван до трецей класи Основней школи „Светозар Маркович Тоза”. Вони часто шпиваю на дзецинских манифестацийох по наших местох. Понеже ше и у їх школи учи руски язик зоз елементами рускей култури як виборни предмет, учителька Ана-Мария Рац их вше повола же би участвовали у програмох.

НАШЛЇДЗЕЛИ ЛЮБОВ ҐУ МУЗИКИ

И їх дїдове, Владимир Маґоч и Михайло Еделински, и тато Борис, роками шпиваю и граю, а тераз свойо таланти розвиваю Иван и Андрей.

Андрей, як седемрочни хлапец, ходзи до пририхтуюцей ґрупи, а Иван до першей класи музичней школи.

– Ище у пририхтуюцей ґрупи зме почали учиц композициї зоз кнїжки. Перше зме поробели уровень А, потим уровень Б и так далєй – приповеда Иван.

И, гоч у дньовей хижи коло мура опарти оцово два ґитари, хлапци рушели по своєй драги. Андрей ше затераз у музичней школи упознава зоз рижнима инструментами и ище лєм здобува основни знаня, пачи ше му гармоника, а Иван ше уж опредзелєл за клавир. Кед зме ше му опитали чи мож помишац били и чарни типки, або шпивац и прицискац педалу зоз ногу, вон нам так гварел:

– Грац на клавиру вообще нє чежко. Лєм треба вежбац, же би ше добре грало. Ми маме и солфедьо, та вец вежбаме. Мнє шицко идзе лєгко – одвитує Иван.

На наших дзецинских манифестацийох обидвоме шпивали, на „Веселинки” и „Пахульки”, як и на „Червеним пупчу”. Попри тим, вше кед ше у Новим Орахове пририхтує даяку програму, вони дзечнє и там наступаю.

ОБИДВОМЕ ТРЕНИРАЮ РОЗВОЙНУ ҐИМНАСТИКУ

Родичи их обидвох уписали на розвойну ґимнастику, котру дзечнє тренираю.

– Я любим ходзиц на тренинґи. Перше робиме даяки вежби, а вец ше бавиме, оганяме, лєбо скакаме до базену зоз шпунджиями. Там сом упознал и нових пайташох – приповеда нам Андрей.

И Иван люби вежбац. Ище вше є нєсиґурни чи будзе тренирац ище дацо, алє тренер Мима им усадзела любов ґу ґимнастики.

Андрей пожадал буц и ґолман, та вше кед бави фодбал зоз пайташами, обовязно става на ґол.

ШЛЄБОДНИ ЧАС И ОДПОЧИВОК

И Андрей и Иван, попри школских обовязкох, маю шлєбодного часу котри препровадзую у читаню кнїжкох и бавеню зоз заячицу Сару.

– Я найволїм читац романи. Волїм читац кнїжки по своїм вибору, пречитам и лектири, алє найволїм кед су романи – гвари Иван.

Понеже любя животинї, родичи им купели заячицу Сару. Вона ма свойо место, а кед видзе до хижи, вец ше зацагнє под стол и там ужива.

През розпуст хлапци любя буц у Новим Орахове, у баби и дїда. Там єст вельо животинї з котрима ше обожаваю бавиц.

– Там маме пса Цукия, мачку Мицку и маче Сивка. Вони двойо ше сами вєдно бавя, бо ше пес бої од мачки. Влєце приду и нашо шетсринїци, Ана и Марина, та ше шицки штверо дружиме – приповедаю хлапци.

У дїдовим и бабовим дворе єст и базен, и трамболина, та розпуст швидко прелєци. Заш лєм, найволя путовац на морйо. Гоч ше треба длуго вожиц. Там ше бавя у писку, купаю ше и по цали дзень су на швижим воздуху.

Вжиме их тато водзи на санканє.

– Кед напада досц шнїгу, вец нас тато одведзе на Ирижски венєц на санканє. Там єст вельо дзеци, бо ше шицки любя бавиц у шнїгу – приповеда Иван.

Бависка на компютеру любя, алє родичи им дошлєбодзую лєм найвецей пол годзини на дзень. Прето и маю кеди за шицко.

ПОВЯЗАНИ ТЕКСТИ