НОВИ САД – У прешлим тижню прейґ Продуктней берзи Нови Сад предате 4.525 тони роби, чия финансийна вредносц 109.140.500 динари. Найвецей ше предавало кукурицу. Цени кукурици и жита ше звекшали, а цена сої була менша як тидзень пред тим, сообщела Продуктна берза.
Кукурицу ше предавало по цени од 17,00 пo 17,50 дин/кґ без ПДВ-a.
Пондерована цена була 17,31 дин/кґ без ПДВ-a (19,04 дин/кґ з ПДВ-oм), так же цена у одношеню на тидзень пред тим була векша за 0,91%. Тарґовина з кукурицу у прешлим тижню заберала 71% од вкупного обтоку.
Жито ше баржей глєдало як цо ше го понукало, а найвецей ше глєдало жито зоз 12% и 13% протеинами. Предавало ше го по цени од 19,00 пo 20,00 дин/кґ без ПДВ-a, у зависносци од параметрох квалитета. Пондерована цена була 19,54 дин/кґ без ПДВ-a (21,49 дин/кґ з ПДВ-oм). Цена жита була векша за 1,53% у одношеню на тидзень пред тим.
На тарґовищу сої була мала активносц, предавало ше ю по цени од 54,00 по 55,00 дин/кґ без ПДВ-a з обраховйованьом квалитета. Пондерована цена була 54,62 дин/кґ без ПДВ-a (60,08 дин/кґ з ПДВ-ом), а то цена менша за 0,69% у одношеню на тидзень пред тим.
Од других робох предавало ше лєм статкови ярец з гектолитерску масу, 60 кґ по цени од 16,20 дин/кґ без ПДВ-a.